نبشتانک: گوریلہ جنگ
نبشتہ کار: ھُدا وشک ءُ مھمد پاروک بلوچ
دی بلوچستان پوسٹ
چارمی بھر
کوہ ءُ گیابان: چَہ بازیں تندجاہ ءُ وانگیاں نبشتہ انت کہ زیردستیں راجاں وتی راجی چیرجنگی جُنز ءِ سکین ءَ آئی ڈیھ ءِ زیبائی وت دنت۔ اگاں تئی ڈیھ ءَ بلاھیں کوہ ءُ گیابان ھست انت گُڑا بزان تو تھنا ءُ بے وارس نہ ئے – درآمدیگی زورانسریں دژمن زیردستیں راج ءِ بزگیں لس مھلوک ءَ چہ وتی لٹ شاپی، گار ءُ بیگواہ کنگ، کُشگ ءُ دور دیگ ءُ وڑ وڑیں ناروائیں زورانسری ءِ آسر ءَ وت چیرجنگی ءَ بے وس کنت ءُ راج ءِ ورنائیں راجی بامرد دیم پہ کوہ ءُ گیاباناں روان کن انت ءُ راجی جُھد ءَ ھوار بنت ءُ دیم ءَ گل ءَ بز کن انت گُڑا ھمے دژمن ءِ پْروش ورگ ءِ اولی یکیں نشانی یے کہ بزگیں اُلس ءِ سر ءَ زلم ءُ کھر کنگ ءَ بندات کنت ءُ چریشی ءَ راج ءِ تہ ءَ گلامی ءِ مارشت ودی بنت۔ انچوشکہ 1971 ءَ گوں بنگالیاں بوتگ چہ ھمے آکبت ءَ دْراھیں بنگالی مُکتیبانی ءِ چیرجنگ ءَ ھوار بیتگ انت ءُ زورانسر ءَ پْروش داتگ۔ کوہ ءُ گیابان ترا پہ لِکّگ ءَ سک کُمک کن انت چریشی ءَ دژمن ءِ سر ءَ ھبکّہ ءُ بے گمانی اُرُشاں پیلو کنگ ءَ ترا باز جْوانیں وڑے ءَ کُمک بنت، تو ڈیھ ءِ کوہ ءُ لداں جْوان سوھو بَہ ئے، شپانک ءُ دیر میتگانی راج ءِ مھلوک ترا ھال ءُ اھوال دنت بلے درآمدیگیں دژمن مُدام چہ کاسگ چٹّاں وازمند انت چمیشکا کوہ ءُ گیان راجی جُنز ءِ یک ٹوھیں بھرے ۔
ڈنّ مُلکانی زری، سیاسی، جنگی کُمکّ ءُ بُنجل: ھر وڑیں چیرجنگاں ڈنّی مُلکانی کُمکّ سک زلوری اِنت اے کُمکّ توری جنگی ساز ءُ سامان ءِ مُپت ءَ دیگ ءِ بہ بیت، توری نوکدربریں چیرجنگولاں نوکیں سِلاھانی گُلینگ ءِ دربری کنگ بِہ بیت، توری چیرجنگ ءِ بلاھیں رھشون ءُ آئی کھول ءَ ھند، بُنجل زَری کُمک دیگ بہ بیت یا توری میان اُستمانی مُچیانی تہ ءَ زیردستیں راج ءِ راجی آجوئی ءِ ھک ءَ گپ کنگ ءِ بہ بیت اے دْراہ چیرجنگ ءُ راجانی آجوئی ءَ کار دے اَنت۔ اگاں جنگانی تہ ءَ جنگی رھشون شھید کنگ بنت گُڑا پلّہ مُرزی ئیں مُلک چیرجنگولانی پلّہ مُرزی ءَ جارکشی کنت ءُ دژمن ءِ زورانسری ءَ پِٹ دنت۔ چریشی ءَ راجی جیڑہ ماں میان اُستمانی رسانکدراں ھر وھد ءَ نوکیں باوستے زور ایت ءُ میان اُستمانی راجانی گل یو این ءُ دگریں ترامگیجاں جنگی اندوہ دلگوش کنگ بیت چریشی ءَ جیڑہ گیشتر ھاٹیگ زور ایت۔گُڑا بہ زان کہ اِے راج ءِ زیردستی پہ میان اُستمانی بنی آدم ءِ ھکانی ترامگیج ءَ یک ٹوھیں جیڑھے بیت کہ توجیلّے دربگیج ایت ئِے۔ پمیشکا ھر راج ءِ راجی سیاسی جُھدکارانی ڈُبہ ءُ زمہ واری بیت کہ پہ وتی راجی چیرجنگولانی سوبین بوگ ءِ ھاتر ءَ ڈنی ملکی کُمکاں بہ درگیج اَنت۔
چوناھیگا سیاسی جُھدکاراں پہ وتی راجی چیرجنگولانی کُمک ءَ اے وڑیں آسراتی چہ دژمن ءِ دژمن ءَ سَک آسانی ءَ رس اَنت۔ انچوشکہ بنگلہ دیش ءِ مُکتیبانی ءَ پاکستان ءِ ھلاپ ءَ ھندوستان ءِ بلاھیں کُمکے گون بوتگ، ھمے داب ءَ اوگانستان ءِ مُجاھدیناں سوت یونین ءِ بگیری ءَ امریکہ، سھودی، چین ءُ پاکستان ءِ ھر وڑیں کُمک گون بوتگ انت، پد ءَ اولی ھلیج کہ گلپ وار گْوش اَنت ئِے ھمے جنگ ءَ کُرد پشمرگا ءِ چیرجنگولاں ایراک سرکار ءِ ھلاپ ءَ امریکہ ءُ سھودی ءِ ھر وڑیں جنگی کُمک گون بوتگ، ھمے داب ءَ ھستیں وھد ءَ یمنی ھوتی چیرجنگولاں سھودی اَرب ءِ سرکماشی ءَ اَرب کولیشن پورس ءِ ھلاپ ءَ ایران، تُرکی ءُ کتر ءِ کُمک گون انت۔
البت چیرجنگ راجی آجوئی ءِ یک سرپدی ءُ آگاھی یے کہ راج ءَ وتی راجی مارشت ءُ راجی جُھد ءِ سرپدی بہ بیت پد ءَ کم کم ءَ چیرجنگ دژمن ءَ ژند ءُ پند کنت ءُ زورانسریں دژمن ءِ سر ءَ دوئیں راججنگ بُنگیج کنت ءُ دوئیں راج پہ وتی راج ءِ ٹوھیں سیتاں پیلو کن انت انچوشکہ ھندوستان ءَ 1971 ءَ چہ مُکتیبانی ءِ کُمک کنگ ءَ گوں پاکستان دو ونڈ ئِے کتگ چی ءَ کہ چریشی ءَ دوئیں ھندوستان ءُ بنگالہ دیش ءِ پائدگ اَت۔ ھمے داب ءَ امریکہ 1991-92 ھلیج جنگ ءَ کُرد پشمرگا ءِ کُمک کت ءُ ایراکی سدام ھُسن ءِ ھلاپ ءَ چہ جنگ آسانی ءَ باج ئِے بُرتگ ءُ چریشی ءَ دوئیں کُرد ءُ امریکہ وتی راجی سیت پیلو کت انت۔ بزاں اگاں تئی دژمن ءِ سر ءَ یک بلاھیں جنگی اندوھے آتک گُڑا تو سد در سد آجو بہ ئے بلے گوں اے بَے ءَ کہ تو وتی زیردستیں راج ءَ مُدام راجی جُنزاں آگاہ ءُ سرپد بہ دار کہ راج ءِ لس مھلوک ءِ تہ گلامی ءِ مارشت ءُ راجی آجوئی ءِ جزبگ زندگ انت۔
اُرشانی بُنگیج ءُ تْرُندی: چیرجنگول وتی مرزی ءِ سر ءَ اُرش ءِ وھد ءُ جاہ گیشین ایت کہ ھما اُرش ءَ جْوانیں اناگتی ءُ ھبکھی یے مان بیت البت لھتیں ھکلیں اُرش بنت کہ آیانی مراسا ءِ جریدگ کنگ ءَ ھپتگ ءُ ماہ ھم لگ ایت ءُ لھتیں بلاھیں جنگی ھکلانی پیلو کنگ ءَ سال ھم مان ایت البت اگاں مراسا ءِ راز پاشک بوتگ گُڑا لھتیں وھد ءَ ھمے جنگی ھکل رد کنگ ءُ پد ءَ بُنگیج کنگ بنت۔ باید انت دژمن ءِ ژند ءُ پندی ءِ ھساب ءَ تْرُندیں اُرُش برجاہ دارگ بہ بنت۔ مُدام ھمے تچ ءُ تاک بیت کہ ناشناس ءُ درآمدیگیں دژمن چَہ چیرجنگ ءَ دمبر ایت ءُ وت ءَ راجی زیردستی ءَ درآمدیگے بہ زان ایت۔ ھمے داب ءَ گیشتر راجی راجدْروہ (گدار) ءُ کاسگ چٹّانی سر ءَ تْرُندیں اُرُش ھم برجاہ دارگ بہ بنت کہ دژمن زیت چہ ڈیھ ءَ درکپ ایت۔
دلگوش: راجی آجوئی ءَ رند کاسگ چٹّ ءُ گداراں ٹوھیں سزا دیگ بہ بنت کہ دژمن مُدام پشل بیت ءُ نوک آجوئیں راج ءِ تہ ءَ آجوئی ارزشت ءُ بستار ءَ بہ زان ایت انچوشکہ بنگلہ دیش ءَ گوں وتی راجدْروھانی (راجی گدارانی) سر ءَ کتگ۔
روان اِنت—
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔