کلات : پاکستانی پوج ءِ بُنجل سر ءَ اُرش کنگ بوتگ

بلوچستان ءِ ضلع کلات ءَ سلاہ بندیں مردماں پاکستانی پوج ءِ بُنجل سر ءَ تُرندیں اُرشے کتگ-

ٹی بی پی اھوالکارانی رِد ءَ گوستگیں شپ ءَ سلاہ بندیں مردمانی مزنیں کچے ءَ کلات ءِ دمگ جوھان ءَ پاکستانی پوج ءِ بُنجاھی بُنجل سر ءَ تُرندیں اُرشے کتگ ءُ تتکگ اَنت-

دمگی اھوالکار ءِ رِد ءَ اُرشکاراں جتائیں سلاھاں چہ اُرش کتگ وھدے کہ اے میان ءَ تُرندیں تیرگواری ءِ ھمراھی ءَ بازیں تراکے ءِ توار اش کنگ بوتگ اَنت-

سرکاری واکداراں تاوانانی درگت ءَ انگت ھچ نہ گْوشتگ بلے گوستگیں شپ ءَ دمگ ءَ بالگردانی توار اش کنگ بوتگ اَنت وھدے کہ مروچی سُھب ءَ ھم بالگرد بُرز بالی ءَ گندگ بوتگ اَنت-

گوستگیں روچ ءَ بلوچستان ءَ ھوار ڈرانڈیھاں یازدہ اگست ءِ درگت ءَ بلوچستان آجوئی ءِ شاتکامی کتگ- ھرچ سال ءَ بلوچانی نیمگ ءَ اے روچ ءَ شاتکامی کنگ بیت- اے روچ ءَ 1947 ءَ برتانیہ ءَ چہ بلوچستان ءِ آجوئی ءِ جار جنگ بوتگ- اگست ماہ ءَ بلوچ سلاہ بندیں گلانی نیمگ ءَ چہ اُرشانی گیشی گندگ بوگ ءَ اِنت-