زیارت ءَ بیڑ ءُ دروگیں میڑ ءَ پد زورانسری آوار جنی ءِ آماچیں مردمانی کھولانی نیمگ ءَ ریڈزون ءَ زھرشانی برجاہ اِنت- کھولانی نیمگ ءَ آدینگ ءِ روچ ءَ روانکے کشگ بیت اِنت مروچی جتا جتائیں پھناتاں بندوکیں سیاسی ءُ چاگردی گلانی باسکاں نندانک ءَ بھر زرتگ ءُ کھولانی گون ءَ پدردی درشان اتگ-
کھول گوستگیں بیست ءُ دو روچاں شال ءَ گورنر ءُ وزیر علیٰ ھاوس ءِ دیم ءَ نیشتگ اَنت-
نندانک ءَ بلوچستان ءِ جتا جتائیں ھنداں بیگواھیں مردمانی کھول ھوار اَنت ھمے وڑ چہ کراچی ءَ بیگواھیں عبدالحمید زھری ءِ زھگ سعیدہ حمید ءُ دوھزار ءُ سیزدہ ءَ ھب چوکی ءَ بیگواھیں سپر بلوچ ءِ ناکو زھگ شائستہ بلوچ ءَ بھر زرتگ- کھولاں باندا بولان میڈیکل کالج ءِ دیم ءَ یک روانکے ءِ کشگ ءُ بھر زورگ ءِ ھاتر ءَ مروچی شال ءِ جتا جتائیں ھنداں وانگ جاہ ءُ دگہ جاھاں پنتاک بھر ءُ بانگ کتگ اَنت-
نندانک ءَ نشتگیں مردمانی گوشگ اِنت بیگواھیں مردمانی کھول انساپ ءِ وداریگ اَنت مئے لوٹاں سرکار دلجمی ءَ زورگ ءَ نہ اِنت سالانی سال زھرشانی ءَ ابید ھم ما لاچار اِنت کہ ترندیں زھرشانی بہ کن ایں-
زھرشانی کنوکانی گوشگ اِنت واکدار مارا گوش بہ دار اَنت آیاں بیگواھیں مردمانی بارو ءَ المی گپ بہ گوش اَنت-
کھولانی گوشگ اِنت داں انگت ءَ مئے لوٹ منگ نہ بیتگ اَنت -کھولانی رد ءَ اے نندانک ھما وھد ءَ داں برجاہ بیت اِنت دانکہ ما گوشدارگ ءُ دل ءُ ستکی اے گپ ءَ باور نہ کنائنینت کہ شمئے بیگواھیں مردمانی کھول دروگیں میڑانی نام ءَ کُشگ نہ بنت-