پاکستان ءَ زورانسری آوار جنیانی ھلاپ ءَ توار چست کنگ ءَ لٹ ءُ کُٹانی دیمپانی کنگ کپ ایت – ایمنسٹی انٹرنیشنل

پاکستان ءَ بیگواھءں مردمانی کھولاں وتی دوستگیں مردمانی ھاتر ءَ زھرشانی پژدر ءَ آیاں بیھار، زاہ ءُ بدانی دیمپانی کنگ کپ ایت بازیں وھداں آیاں زھرشانیانی وھد ءَ لٹ ءُ کُٹانی دیمپانی کنگ کپ ایت – اے گمان ایمنسی انٹرنیشنل پشمبے ءِ روچ ءَ یک نوکیں رپورٹے ءَ کرتگ اَنت-

ایمنسٹی انٹرنشنل ءِ رد ءَ ھمے سال ءِ سیزہ جون ءَ سندھ اسمبلی ءِ دیم ءَ بلوچ یکجھتی کمیٹی کراچی ءُ وائس فار بلوچ مسنگ پرسنز ءِ نیمگ ءَ دو بلوچ نودربر دودا بلوچ ءُ گمشاد بلوچ ءِ زورانسری آوار جنی ءِ ھلاپ ءَ سندھ اسمبلی ءِ دیم ءَ بلوچ زالبول لَٹ ءُ کُٹانی نشانگ کنگ بیتگ اَنت-

رپورٹ ءَ گشگ بیتگ کہ سندھ پولیس ءَ زالبولاں شھمات جتگ ءُ ورنا لٹ ءُ کُٹ کتگ اَنت چریشی ءَ باز زدگ بیتگ اَنت-

ایمنسٹی انٹرنیشنل ءِ بیان ءِ رد ءَ اے وئیل ءَ اے گپ راست بیت اِنت پولیس ءُ چیریں ادارہ پُرایمنیں زھرشانی ھلاس کنگ ءَ گیر زوروری تاکت ءَ کارمرد کن اَنت اے کار میان اُستمانی رھبندانی لگتمالی اِنت-

بلوچ یکجھتی کمیٹی کراچی ءِ ارگنائزر آمنہ بلوچ ءَ ایمنسٹی انٹرنیشنل ءِ رپورٹ سرکار ءِ دیم ءَ یک شھماتے ءِ دیم سیاھی ءُ رپورٹ راستی ءِ پدر اِنت –

آمنہ بلوچ ءَ گشتگ کہ ھمے زُتاں سندھ ءِ سرکار ءَ بلوچ یکجھتی کمیٹی کراچی ءَ رھوت کرتگ ءُ آیاں گپ ءُ تران کنگ ءِ سَلاہ جتگ ءُ درچ ءَ وزیرعلیٰ سندھ سید مراد علی شاہ ءِ گوشگ ءِ پد ءَ سندھ ءِ کلانیں وزیر میر شبیر بجارانی ءَ کھولانی گون ءَ گند ءُ نند کرتگ ءُ اے گند ءُ نند ءَ کھول سدکی دیگ بیتگ اَنت آیانی بیگواھیں مردم زوت یل کنگ بنت بلے داں انگت ءَ ھچ گپ دیم ءَ نیتکگ اَنت-

آمنہ بلوچ ءَ گشتگ کہ چہ کراچی ءَ بیگواھیں مردمانی یل کنائینگ ءَ جد ءُ جھد یک پُر امن ءُ جمھوری رنگے ءِ زرمبشت اِنت سرکار ءُ ادارہ کانون ءِ شرپ ءَ بہ کن اَنت ءُ بیگواھیں مردمان آمیدگساں پیش بہ کن اَنت-

آمنہ بلوچ ءَ گشتگ کہ سرکار ءَ لوٹ اِنت جمھوری جد ءُ جھد ءِ شرپ ءَ بہ کنت کانون ءُ رھبندانی تہ ءَ بہ بیت سندھ ءَ بیگواھیں مردمانی یل کنگ ءَ المی بہ کنت مئے جمھوری ءُ کانونی زرمبشت ءِ ھلاس کنگ ءَ تاکت ءَ کارمرد مہ کنت-

آمنہ بلوچ ءَ گشتگ کہ کانونداروکیں ادارہ رھبنداں لگتمال کنگ ءَ اَنت ھمے رنگ ءَ سندھ ءَ انسانی ھکانی لگتمالی بیگ ءَ اِنت اے وھد ءَ بازیں مردم سی ٹی ڈی ءُ وفاقی ادارھانی زنداناں اَنت آ ھم بے گناہ اَنت-