بلوچستان کے ھند شاھ آباد ءَ چہ زورانسری بیگواھی ءِ آماچ بیتگیں اللہ رکھا ءِ کھول ءَ آئی دیمءَ آرگ ءِ دزبندی کنان ءَ گُشتگ کہ اللہ رکھا یل کنگ بہ بیت ءُ مارءَ چہ ذھنی جنجالاں در کنگ بہ بیت۔
اھوالانی رد ءَ بلوچستان ءِ دمگ تُربت ءِ ھند شاھ آباد ءِ بلوچی بازار ءَ چہ 11 اگست 2021 ءَ ریاستی لشکریاں اللہ رکھا ء سید محمد دزگیر کنگ ءَ پد بیگواہ کُتگ اَت۔ کھول ءِ ردءَ آ ھمے اوست ءَ راھچار بیتگ اَنت کہ آھانی دوستیگ زیت یل کنگ بیت اِنت بلے یک سالے ءِ وھد گوزگ ءَ پد ھم مارءَ اللہ رکھا ءِ درگت ءَ ھچ پئیمیں اھوال دز نہ کپتگ اَت۔
آھاں گُشتگ ما سرپد نہ اِنت کہ آ کجام جاورانی تہءَ اِنت، آھاں گُشتگ ما اے ھم نزانیں کہ آ کجام جرمکاریانی سوب ءَ چُشیں زنداناں بند کنگ بیتگ۔ آھاں گُشتگ کہ اللہ رکھا ءِ زورانسری بیگواھی ءَ سرجمیں کھول ذھنی جنجال ءُ اندوھانی تہءَ مان کُتگ۔
آھاں دیمتر ءَ گُشتگ کہ ما یک سک بزگیں کھول ءَ گوں سیادی داریں مئے گورءَ انچوک ھم زر نیست کہ ما بیگواھیں مردمانی کیمپ ءَ شُت بہ کنیں یا اگں دوستیگ ءَ آمیدگس ءَ شُت بہ کنیں۔ آھاں چہ پاکستان ءِ مزن وزیر، سپریم کورٹ آف پاکستان، انسانی ھقانی ادارگ ءُ اھوالکاراں چہ دزبندی کُتگ کہ آ مئے توار جوڑ بہ بنت ءُ مئے دوستیگیں مردمے یل کنائنگ ءِ ھاترءَ کرد پیلو بہ کن اَنت۔
آھاں گُڈ سرءَ گُشتگ ما چہ وائس فار بلوچ مسنگ پرسنز ءُ دگہ بلوچ گلاں ھم دزبندی کنیں کہ آ اللہ رکھا ءِ ھاترءَ توار چِست بہ کن اَنت ءُ آئی یل کنائنگ ءَ باوری بہ کن اَنت۔