بلوچستان لبریشن فرنٹ ءِ جارکشّ میجرگْوھرام بلوچ ءَ شیوار کنان ءَ گْوشتگ کہ چاردہ ساچان ( 14 اگست ) ءَ ماں بلوچستان ءَ ’ زُورگِر پاکستان ‘ ءِ نام گِپت ءُ وتگڑیں شادِہ ء آجوئی ءِ میڑ ءُ مُچّیانی برجاہ دارگ ءِ ھِچّ رنگ ءَ موکل نہ دنت، ءُ اے مراگش بی ایل ایف ءِ نِشانگ ءَ اَنت پمشکا بلوچ راج چرے وتگڑیں میڑ ءُ مُچّیانی بھر زُورگ ءَ چہ پھریز بِہ کنت۔
آئی دیمتِر ءَ گْوشتگ کہ بلوچستان یک ایردستیں سرڈگارے کہ آئی سر ءَ پاکستان ءَ وتی کْوزہ برجم داشتگ، ءُ ھمے کْوزہ ءِ بگیر ءَ بلوچ راج جُھد ءُ کُوشست کنگ ءَ اِنت۔ آجوئی ءِ اے جُھد ءَ ھزاراں بلوچاں وتی زِندمان کولیگ کُتگ دانکہ بلوچ راج وتی ڈیھ ءُ سرڈگار ءِ سر ءَ آجوئیں زِندے بِہ گْوازینیت۔ ما اے دیمونیاں ھِچّ رنگ ءَ زوال آماچی ءَ نیل اِیں، گوں دُژمِن ءَ ھر پِڑ ءَ جْوانمردی ءَ مُکابِلہ کن اِیں۔
’ پاکستانی لشکر بلوچستان ءَ وتی کاسگ چٹّانی تُپنگ ءِ زُور ءَ یکجاہ کنگ ’ شادِہ ءِ آجوئی ءِ برجاہ دارگ ‘ ءِ دلگوش گْور کنگ ءُ گُمانے دَیَگ لوٹ اِیت، بلے بلوچستان لبریشن فرنٹ وتی زیردستیں سرڈگار بلوچستان ءَ زُورگِریں پاکستان ءِ نام گِپتیں شادِہ ء آجوئی ءَ ھِچّ وڑ ءَ سگ ءُ اُوپار کُت نہ کنت۔ اے رنگیں میڑ ءُ مُچّیانی بے سوب ءُ نابود کنگ ءِ ھاتِر ءَ گل وتی توامیں واک ءَ کاربند اِیت۔‘
میجر گْوھرام بلوچ ءَ دیمتِر ءَ گْوشتگ کہ مارا اُمیت اِنت بلوچ راج ھم بی ایل ایف ءِ ھمگامی ءَ دُژمِن ءِ چاردہ ساچان ( 14 اگست ) ءِ میڑ ءُ مُچّیاں چہ دزکشّ بیت۔
آئی دیمتِر ءَ گْوشتگ کہ وتی زھگ ءُ کھول ءِ اے دِگہ مردُماں گوں تْرندی ءَ شیوار ءُ سرپد بِہ کن اِت کہ آ اے وتگڑیں میڑ ءُ مُچّیانی نزّیک ءَ مہ رَوَ اَنت۔ بی ایل ایف نہ لوٹ اِیت کہ چہ آئی اُرش ءَ بلوچاناں جانی ءُ مالی نُکس ءُ تاوانے بِہ رس اِیت، بلے راجی جنگ ء آجوئی ءَ جاندُزّی مئے راجی سلامتی ءَ ھترہ ءِ دیمپان کنت۔ پرے ھاتِر ءَ چہ بلوچ راج ءَ ارز ءُ گُزار اِنت کہ آ وتی راجی لشکر ءِ گوم ءَ ھر رنگیں کُمکّ بِہ کنت دانکہ بلوچ راج ءَ را چرے گُلامی ءُ ایردستی زِندمان ءَ زُوت آجوئی بِہ رس اِیت ءُ وتی ڈیھ ءِ وتواجہ بِہ بیت۔