کلات ءَ پولیس تھانہ ءِ سر ءَ بمب تراکے بوتگ

بلوچستان ءِ ضلع کلات ءَ پولیس تھانہ ناشناسیں مردماں بمب تراکے ءِ نشانگ کتگ-

سربوتگیں ھالانی رِد ءَ چارشمبے ءِ شپ ءَ کلات پولیس تھانہ ءِ سر ءَ ناشناسیں مردماں دزبمبے چگل داتگ ءُ تتکگ اَنت- تراک ءِ توار سرجمیں شھر ءَ اش کنگ بوتگ-

واکداراں تنی وھدے تاوانانی درگت ءَ درشان شنگ نہ کتگ-

تراک ءَ پد پولیس ءَ ھوار پوج ءَ دمگ انگر ءَ کتگ ءُ پٹ ءُ پول برجاہ کتگ-

مروچی بلوچستان ءَ اے بوتگیں دومی بمب تراک اِنت – ساری ھُزدار ءِ شھر ءَ پاکستانی بیرک بھاکنوکیں اسٹال سر ءَ ناشناسیں مردماں دزبمبے ءَ گوں نشانگ کتگ اَت-

ھُزدار ءِ اُرش زمہ واری بلوچ لبریشن آرمی ءَ منّ اِتگ- گل ءِ جارکش جیئند بلوچ ءَ بیھار شنگ کتگ ءُ گْوشتگ کہ وتگڑیں پاکستانی آجوئی شاتکامی ءِ سر ءُ پُرانی سر ءَ تُرند ءَ چہ تُرندتریں اُرش کن ایں-