بلوچستان ءِ ضلع مستونگ ءَ پوج ءَ سے مردم زورانسری آوار جتگ اَنت کہ آیانی تہ ءَ یک ٹپی یے نودربرے ھوار اِنت-
سربوتگیں ھالانی رِد ءَ مستونگ ءِ دمگ کاریز سور ءَ سی ٹی ڈی ءَ ملک احمداب شاھوانی لوگاں بیڑبرتگ، ھمے میان ءَ پوج ءِ تیرگواری ءَ چہ یک مردمے ٹپی بوتگ وھدے کہ زالبوالاں ھوار لوگ ءَ ساڑی ئیں آ دگہ مردم لٹ ءُ کُٹ کتگ اَنت-
سی ٹی ڈی کارندھاں نعمان، ندیم ءُ نودربر شاھد حسین آوار جتگ ءُ ناشناسیں جاھے ءَ برتگ اَنت – اِھوالکارانی رِد ءَ شاھد حسین ءَ تیر لگ اِتگ بلے سی ٹی ڈی کارندھاں گوں وت برتگ –
دمگی واکداراں تنی وھدے اے درگت ءَ گپ نہ کتگ بلے یک ھپتگے ءِ تہ ءَ بلوچستان ءَ اے دومی وئیل اِنت بوتگ-
اشی ءَ ساری ھم سی ٹی ڈی ءُ فرنٹیئر کور کارندھاں حاجی ثناء اللہ شاھوانی نامیں مردمے ءِ لوگاں بیڑبرتگ ءُ سئیں چُک گوں وت برتگ اَنت کہ آیانی تہ ءَ دو مردم ٹپی ئیں جاوراں برگ بوتگ اَنت اشی ءَ پد بیگواہ کنگ بوتگیں سئیں براتانی تہ ءَ عمران شاھوانی ءُ عامر شاھوانی چہ شال ءَ ٹپی ئیں جاوراں دزکپتگ اَنت کہ آ ٹراما سینٹر شال ءَ برتگ اَنت بلے آ پش نہ کپتگ اَنت-
اے وئیل سر ءَ ثناءاللہ شاھوانی ءَ پریس کانفرنس کنان ءَ گْوشتگ کہ پوج کارندھاں لوگ ءَ بیڑبرتگ ءُ مردمانی سر ءَ لَٹ ءُ کُت کتگ ءُ تیرگواری کتگ-