بلوچستان ءِ کیچ دمگ ءَ گوستگیں شپ ءَ ادار یازدہ ءِ نزیک ءَ پاکستانی لشکریاں بیڑ بُرتگ ءُ دو کسانسال دزگیر کنگ ءَ پد ناشناسیں جاھاں بُرتگ اَنت۔
اھوالانی ردءَ تربت ڈنک ءَ گوستگیں شپ ءَ ادار یازدہ ءَ پیراملٹری فورسزاں موسیٰ نامی مردمے ءِ لوگے سرءَ بیڑ بُرتگ ءُ دو زھگ بیگواہ کُتگ ءُ ناشناسیں جاھاں بُرتگ اَنت۔
بیگواھیں نودربرانی پجار بالاچ ءُ براھمدگ ء موسیٰ ءِ ناماں بیتگ، ایشانی تہ ءَ براھمدگ نھمی ءُ بالاچ چھارمی مکتب ءِ نودبر اَنت۔
دزگیر بیتگیں دوھیں کسانسال گوستگیں سالاں کیچ ءَ ڈیتھ اسکواڈ ءِ دست ءَ نمیران بیتگیں ملک ناز ءِ سیاد اَنت۔
زانگ بہ بیت کہ دو ھزار بیست ءَ کیچ ءِ ھند ڈنک ءَ کتکاریں مردماں دُزی ءِ ھاترءَ شپ ءِ نیم ءَ لوگے ءِ سر ءَ اُرش کُتگ اَت،لوگ ءَ دُزانی دیم ءَ اوشتوکیں ملک ناز نامی جنینے ءِ گھگیری کنت کہ اِشی سوب دُزاں ملک ناز تیرگواری کُتگ ءُ کُشتگ اَت۔
تیرگواری ءَ ملک ناز ءِ تپلیں جِنِک برمش ھم ٹپی بیتگ اَت، اے کوش ءِ بگیر ءَ بلوچستان ءُ درملکاں زھرشانی ءُ روانک کشگ بیتگ اِت اَنت، جتا جتائیں سیاسی و چاگردی گلاں اے کوش ءِ بگیر ءَ زھرشانی کُتگ اَت ءُ کتکاراں سز ءَ دیگ ءِ لوٹ کُتگ اَت۔
سرکاری واک ءُ پولیس ءِ ردءَ اے وئیل ءَ ھواریں درستیں کتکار زندانی کنگ بیتگ اَنت وھدیکہ لس مھلوک ءَ لوٹ کُتگ اَت کہ اے سلکارانی سلاہ پچگرگ بہ بنت کہ اشاں سرکارے مستری گون اِنت۔