شمالی وزیرستان ءِ ھند میر علی ءَ پوجی کاروان ءِ سرءَ وت کشیں تراک ءَ 4 کارمند مرتگ اَنت۔
پاکستان پوج ءِ جارکش آئی ایس پی آر ءِ ردءَ پوجی کاروان ءِ سرءَ اُرش شمالی وزیرستان ءِ ھند میرعلی ءَ کنگ بیتگ۔ وت کُشیں اُرش 4 پوجی کارمند مُرتگ اَنت۔
آئی ایس پی آر ءِ ردءَ مرتگینانی تہءَ لانس نائیک شاہ زیب، لانس نائیک سجاد، سپاھیگ عمیر ءُ سپاھیگ خرم ھوار اَنت۔
آئی ایس پی آر ءِ نیمگ ءَ شنگ بیتگیں درشان ءِ ردءَ انٹیلی جنس ایجنسیاں وت کُشیں اُرشکار ءُ آئی کمککارانی درگت ءَ اھوال درگیجگ ءِ ھاترءَ پَٹ پول بندات کُتگ۔
گوستگیں ماھانی تہءَ قبائلی دمگ شمالی وزیرستان ءَ پاکستانی لشکریانی سرءَ اُرش ءُ میڑ ھمک روچی گپ جوڑ بیتگ۔ گوستگیں ماہ ءَ 4 جولائی ءَ ھمے ھنداں لشکریانی کاروان ءِ سرءَ وت کُشیں تراک ءَ کم چہ کم 10 پھازگی کارمند ٹپی بیتگ اِت اِنت۔
چر آئی ءَ پیسر 30 مئی ءَ پرپٹ سواریں وت کُشیں اُرشکار ءَ رزمک ءِ ھند ءَ پاکستانی لشکریانی یک کاروانے ءِ سرءَ اُرش کُتگ اَت۔