شال : یک مردمے زورانسری آوار جنی ءَ پد بیگواہ

سربوتگیں ھالانی رِد ءَ بلوچستان ءِ بنجاھی شھر شال ءَ پاکستانی پوج ءَ یک مردمے آوار جتگ ءُ بیگواہ کتگ –

ٹی بی پی پتر ءَ سربوتگیں ھالانی رِد ءَ شال ءِ دمگ جوائنٹ دگ ءَ پاکستانی پوج ءَ مقبول نامی مردمے زورانسری آوار جتگ ءُ بیگواہ کتگ –

مقبول ء مستری محمد خان شال ءِ دمگ کلی اسماعیل ءِ جھمنند انت وھدیکہ بنکی ءَ کلات ءِ دمگ منگچر ءَ نشتگ بوتگ –

واکدارانی نیمگ ءَ تنی وھدی اے درگت ھچ گوشگ نہ بوتگ زانگ بہ بیت بلوچستان ءَ یکرندے پدا زورانسری آوار جنیانی تہ ءَ گیشی اتکگ –

دومی نیمگ ءَ بنجاھی شھر شال ءَ گورنر کارگس ءِ دیم ءَ بیگواھیں مردمانی کھولاں مروچی ھژدہ روچ سرجم انت کہ نندانک ءِ جتگ ءُ نشتگ انت – درنگاز کنوک زیارت ءِ لشکر کشی ءَ دروگیں میڑ ءَ بیگواھیں مردمانی کُشگے پٹ پول ءُ دگہ لوٹانی منارینگ ءِ ھاتر ءَ زھرشانی بوگ ءَ انت –

بلے تنی وھدی سرکار نیمگ ءَ نندانک ءَ نشتگیں مردمانی گوم ءَ گند ءُ نند ءِ ھاتر ءَ ھچ وڈیں گامگیج زورگ نہ بوتگ وھدیکہ دلگوش نہ دیگے سر ءَ درنگاز کنوکانی نیمگ ءَ بی این پی ءُ این پی ءِ سر ءَ ھم تنکید کنگ بوگ ءَ انت –