سبی ءَ پاکستانی پوج ءِ سر ءَ اُرش

سربوتگیں ھالانی رِد ءَ بلوچستان ءِ دمگ سبی ءَ ناشناسیں سلاہ بندیں مردماں پاکستانی پوج ءِ سر ءَ اُرش کُتگ –

گیشیں ھالانی رِد ءَ پاکستانی پوج ءِ سر ءَ اُرش سبی ءِ دمگ کرمووڈھ ءَ کنگ بوتگ – دمگی اھوالکارانی رِد ءَ اُرشکاراں راکٹ ءُ دگہ سلاھانی گوم ءَ پوج ءِ سر ءَ اُرش کُتگ کہ دمگی مردماں دیراں تاں تیرگواری ءُ تراکانی توار اشکُتگ انت –

اھوالکار ءِ رِد ءَ اُرش ءَ پد سلاہ بندیں مردم درآھگ ءُ روگ ءَ سوبمند بوتگ انت وھدیکہ پوج ءَ بازار ءِ سر ءَ بازیں مارٹر گولہ ءِ آس داتگ –

سرکاری بنشون ءِ نیمگ ءَ تنی وھدی اے درگت ءَ ھچ وڈیں ھال شنگ کنگ نہ بوتگ – زانگ بہ بیت گوستگیں بیست ءُ چار ادارانی میان ءَ پاکستانی پوج ءِ سر ءَ اے چارمی اُرش بوتگ –

اے اُرشاں پیش یکیں روچ ءَ کلات ءِ دمگ منگچر بلوچ آجوئی لوٹوکیں گل بی ایل اے ءِ نیمگ ءَ فرنٹیر کور ءِ گاڑی ءِ بمب تراک ءِ نشانگ کنگ بوتگ ھمے وڈ گوادر میرین ڈائیو ءَ بی ایل ایف ءِ نیمگ ءَ پوج ءِ گاڑی ءِ تراک ناکیں شورانی نشانگ کنگ بوتگ –

وھدیکہ گوستگیں روچ ءَ بلوچستان ءِ بنجاھی شھر شال ءَ پرپٹ ءِ سر ءَ تراک ناکیں شورو بندگ بوتگ ءُ تراکینگ بوتگ انت کہ آئی ءِ زمہ واری ھم بلوچ آجوئی لوٹوکیں گل بی ایل ایف ءَ منّ اِتگ –