بلوچ سرمچار وانندھیں مردم انت، جاورھالاں آ لاچار کُتگ انت – محراب بلوچ

در جمھوری رویش، گچین کاریاں سرکاری مشینری ءِ کارمرز کنگ ءُ راج ءِ مینڈیٹ ءَ دُزی کنگ ءِ سوب ءَ جیڑہ گیش بوان انت، کوھانی تہ ءِ جنگ کنوکیں سنگت وش مزاج ءُ وانندھیں مردم انت جاور ھالاں آ لاچار کُتگ انت – چئیرمین محراب بلوچ

بلوچستان ءِ دمگ کوھلو ءَ نیشنل پاٹی ءِ دمگی سرکماش محراب بلوچ ءِ چیردستی ءَ گرانھادی، بے روزگاری ءُ کرپشن ءِ بگیری ءَ زھرشانی روانک ءِ کشگ بوتگ، روانک کشوک نیشنل پاٹی ءِ دمگی سیکرٹریٹ ءَ دراتکگ ءَ تان ٹریفک چار راہ ءَ اتکگ انت ءُ ھمدا آھاں مچی کُتگ – مچی ءَ نیشنل پاٹی ءِ دمگی سرکماش محراب بلوچ، وڈیرہ عزیز پوادی، نور خان دشتی، وڈیرہ اعلیٰ نواز پوادی، سردار یاسین ژنگ، اللہ بخش مری، غنی شاہجہ، خلیق سومرانی، مولانا امیر جان فضل بلوچ ءُ دگہ مردماں تران کتگ –

ترانکارانی گوشگ ات کہ کوھلو ءِ ھر تکاں کرپشن انت، میڑٹ لگتمال بوگ انت نوکری بہا بوگ انت چریشی ءَ وانندھیں نودربر بے روزگاری سوب ءَ در پہ در انت –

آیاں گوشتگ کہ کوھلو ءَ سرکاری واکدارانی زرواری گیش بوتگ اَنت دراھیں بند ءُ ساچی کار درگان درگان کنگ بیتگ اَنت بلے بد بھتی ءَ ھچ جست کنوک نیست اِنت ھمے زوتاں لیویز ءِ انٹرویو ھم لب ءُ لاچاں بیتگ اَنت اشی ءَ نیشنل پاٹی رد کنت ءُ مھکمہ جنگلات ءَ ھوار دراھیں جونیئر آفیسر دُز ءُ ڈنگانی سر ءَ یل کنگ بیتگ –

آھانی گوشگ ات کہ ھمے زوتاں ھئور ھاراں کوھلو ءَ بازین جانانی تاوان بوتگ بازین بزگرانی گس لمبتگ ءُ کپتگ انت وھدیکہ آھانی کشار ھم تباہ ءُ برباد بوتگ انت بلے دمگی واکدارانی نیمگ ءَ ھار آماچ بوتگیں مردمانی ھاتر ءَ ھچ وڈیں کمک بوگ ءَ نہ انت –

نیشنل پاٹی ءِ دمگی سرکماش محراب بلوچ ءَ دیمتر ءَ گوشتگ کہ در جمھوری رویش، ھما گچین کاری کہ المی نہ انت آھانی تہ ءَ دزمانجنی ءُ سرکاری مشینری ءِ کارمرز کنگ ءُ راج ءِ مینڈیٹ ءَ دُزی کنگ ءِ سوب ءَ بلوچستان جیڑہ روچ پہ روچ گیش بوان انت – آئی ءِ گوشگ ات کہ کوھانی تہ ءِ جنگ کنوکیں سنگت وش مزاج ءُ وانندھیں مردم انت جاور ھالاں آ لاچار کُتگ انت کہ مروچی مزن مزنیں ٹارگٹ کنگ ءَ انت کہ ھچ کس پھمیت نہ کنت –