دروگیں میڑاں زورانسری آوار جنگ بوتگیں مردم کُشگ بوگ ءَ انت – ماما قدیر

بلوچستان ءِ بنجاھی شھر شال ءَ بیگواھیں بلوچانی یل نہ کنگ ءُ زورانسری آوار جنیانی بگیری ءَ وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ ھپت سد ءُ پانزدہ روچ سرجم بوتگ انت – چہ چاگی ءُ دالبندین ءَ سیاسی ءُ چاگردی باسک رسول بخش بلوچ، عبدالنبی بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ اگاں ما وتی جندے واھشت ءُ وتی منی ءَ در نہ اتکیں گڈا راج چدوگیشتر اڈوجنجالانی دیمپان بیت –

آئی ءَ گوشتگ کہ بلوچستان ءَ ھمک روچ کہ بام ٹِک دنت جھد کنوکاں وتی منزل ءِ نیمگ ءَ گامے دیم ءَ رؤگے درونت ءُ شھیدانی ھونانی وشبوہ ءِ تالان کنت –

آئی ءَ گوشتگ کہ گرماگ ءِ گرمی ءَ زورگیریں ریاست ءَ وتی زوراکیانی گیشی آرتگ ءُ بلوچانی سر ءَ زمینی ءُ برزی زوراکی برجاہ داشتگ انت – مستونگ، اسپلنجی، جوان کلات، نوشکی، چاگی ءُ بلوچستان ءِ دگہ ھند ءُ دمگاں زورگیریں پوج ءَ لشکر کشی کُتگ اودے جھمنند برزی ءُ جھلی پوج ءِ تاکت ءَ گوں ھونین کُتگ –

ماما قدیر بلوچ ءَ گوشتگ کہ ہرنائی زیارت ءَ پاکستانی پوج ءَ بیگواھیں مردمانی دوازدہ جون نادراھجاہ ءَ سرکتگ انت، زانگولی ءِ سوب ءَ جونانی پجار نہ بیت – پوج ءِ نیمگ ءَ دروگیں میڑاں بیگواھیں مردمانی جونانی دور دیگے ءِ تہ ءَ گیشی اتکگ –