کراچی صدر ءَ بمب تراک کنوک ءِ دزگیری ءِ ٹاہ

بیست ءُ سَے سالی شیراز احمد چہ حب ریور دگ ءَ دزگیر کتگ – واکدار

کاؤنٹر ٹررزم ڈیپارٹمنٹ ءَ دوازدہ مئی ءَ کراچی ءِ دمگ صدر ءَ بوتگیں بمب تراک ءَ کتکارے دزگیر کنگ ءِ ٹاہ داتگ –

ایس ایس پی زبیر نزیر شیخ ءَ گوشتگ کہ سی ٹی ڈی ءَ چہ حب ریور دگ ءَ صدر ءَ بمب تراک کنوکیں کتکارے دزگیر کتگ –

آئی ءَ گوشتگ کہ کتکار ءِ نام شیراز احمد انت کہ وئیل ءَ پد تتکگ شتگ کہ چیزے روچ بیت واتر اتکگ بوتگ –

شیراز احمد سند ءِ دمگ قمبر شہداد کوٹ ءِ نندوک انت کہ شش سال ساری ھب ءَ اتکگ ءُ نشتگ –

شیراز پہ روزگار ءِ ھاتر ءَ دبئی ءَ ھم شُتگ بوتگ – واکدارانی گوشگ انت کہ کتکار ءَ سال دوھزار ءُ پانزدہ ءَ آجوئی لوٹوکیں گل سند ریوولیشنری آرمی (ایس آر اے) بھر زرتگ –

زانگ بہ بیت ھمے سال ءِ دوازدہ مئی ءِ شپ ءَ کراچی ءِ باپاری شھر صدر ءَ یونائیٹڈ بیکری ءِ نزیک ءَ تراک ءِ بوتگ ات کہ تراک ءَ یک مردمے بیران ءُ بازینے زدگ بوتگ انت –

تراک ناکیں شورو پرپٹ ءَ بندوک بوتگ انت ءُ تراک ریموٹ کنٹرول کمک ءَ کنگ بوتگ –

پرپٹ ءِ آروک ءُ ھمے جاہ ءل ایرکنوکیں مردم اللہ ڈنو وئیل ءَ چیزے روچ پد جنگ بوتگ ات بلے بازیں مردمانی گوشگ انت کہ اللہ ڈنو دروگیں میڑ ءِ نام ءَ جنگ بوتگ کہ پیش ءَ سی ٹی ڈی ءَ دزگیر کتگ ءُ ھمائی ءَ گون بوتگ-

صدر ءَ بوتگیں تراک ءِ زمہ واری سندھ ریوولیشنری آرمی ءَ منّ اِتگ ات ءُ جارکش ءَ ھمے گوشتگ ات کہ اے اُرش ءَ کھوسٹ گارڈ ءِ گاڑی نشانگ کنگ بوتگ کہ چریشی ءَ چار کارمند مُرتگ انت –