لسبیلہ ءَ بازیں نادراھیاں جھ جتگ

بلوچستان ءِ دمگ لسبیلہ ءَ ھئور ھارانی سوب ءَ بازیں ھنداں وڈ وڈیں نادارھی دیما اتکگ اَنت – بلوچ یکجھتی کمیٹی کراچی ءِ نیمگ ءَ لاکھڑا ءَ میڈیکل بنجل برجم دارگ بوتگ اَنت-

پنچ شمبے ءِ شپ ءَ بلوچ یکجھتی کمیٹی کراچی ءِ کمک کاراں بازیں درمان لسبیلہ ءِ دمگاں سر کتگ انت کہ اودا مردمانی الاج برجاہ بوتگ بلے دمگی انتزامیہ ءَ بی وائی سی میڈیکل ٹولی ءُ کمکار کار ءَ نہ اِشتگ انت-

دمگی واکدارانی نیمگ ءَ بلوچ یکجھتی کمیٹی ءِ میڈیکل ٹولی ءُ کمکار زورانسری چہ لاکھڑا در کُتگ ءُ اُوتھل ءَ دیم داتگ انت ھمے گوشتگ کہ آ واکدارانی نیمگ ءَ جتگیں میڈیکل بنجلانی تہ ءَ وتی کار ءَ برجاہ بہ دار انت-

اے وئیل ءِ درگت ءَ بلوچ یکجھتی کمیٹی کراچی ءِ آرگنائزر آمنہ بلوچ ءَ لسبیلہ ءِ ڈی سی مراد کاسی ءَ گوں ھال کتگ ءُ ترندی ءَ گوں گوشتگ کہ سرکار ءِ گور ءَ ھار ءَ برتگیں مردمانی جاندراھی ءِ ھاتر ءَ ھچ وڈیں میڈیکل بنجل نیست اِنت ءُ ناکہ درمان ھست گڈا آھاں ھچ ھک نیست کہ بی وائی سی ءِ کمکاراں زورانسری بہ دار انت وتی پئیم ءَ کار بہ گر انت کہ اشی ءِ درگت ءَ لسبیلہ ڈی سی ءَ گوشتگ کہ من ھچ ءَ سرپد نھاں اے جیڑہ ءَ ما زوت گیشگیوار کن ایں- بازیں ادارانی گوزگ ءَ پد ڈی سی ءِ گوشگ ءِ پد ءَ واکداراں بی وائی سی ءِ ٹولی لاکھڑا روگے موکل داتگ اَنت-

ٹولی ءِ یل دیگ ءَ پد بلوچ یکجھتی کمیٹی کراچی ءِ ڈاکٹر ماھجبین ءِ سرکماشی ءَ میڈیکل ٹولی ھمے دمگاں سربوتگ ءُ وتی کار ءِ برجاہ داشتگ-

زانگ بہ بیت بلوچ یکجھتی کمیٹی کراچی ءِ گوشگ ءِ پد ءَ کراچی ءِ دمگ ملیر ءِ جھمنند ڈاکٹر ماھجبین وتی ٹولی ءِ ھمراھی ءَ اے دمگاں مردمانی مپت الاج ءِ ھاتر ءَ رازی بوتگ-

لسبیلہ ءِ دمگ لاکھڑا ءَ ملیریا، گیسٹرو، ڈائریا ءُ پوست ءِ نادراھیانی تہءَ سک باز گیشی اتکگ وھدیکہ درساں گیش زھگ اے نادراھی ءِ آماچ اَنت-

بلوچ یکجھتی کمیٹی کراچی ءِ کمکارانی رِد ءَ اے نادراھی ھرابیں آپانی سوب ءَ تالان بوتگ اَنت- اے دمگاں ھاراں برتگیں مردمانی ھاتر ءَ ناکہ بلوچستان ءِ سرکار دیم ءَ اتکگ ءُ ناکہ دمگی نمائندگاں وتی زمہ واری پیلو کرتگ اَنت چریشی ءَ سرجمیں دمگ ءَ پلگچ ءُ ھراب اَنت-

بلوچ یکجھتی کمیٹی ءِ آرگنائزر آمنہ بلوچ ءَ لاکھڑا ءَ نادراھی نہ دارگے سر ءَ سرکار ءِ اے رویش ترندی ءَ گون ایرجتگ ءُ گوشتگ کہ بلوچستان ءِ سرکار ھار ءَ برتگیں مردمانی نام ءَ بس اکس کشی کنگ ءَ اِنت-

آمنہ بلوچ ءَ گوشتگ کہ ھارانی آماچ بوتگیں دمگاں کورانی تہ ءَ اوشتوکیں ھرابیں آپاں چہ نادراھی تالان بیت کن اَنت-

آمنہ بلوچ ءَ گوشتگ کہ بلوچستان ءَ ھئور ھار برجاہ انت چریشی ءَ مرگ ءُ نادراھی گیش بوت کنت- لسبیلہ ءِ نادراھجاہ سرکار ءِ نادلگوشی ءَ ویران اَنت ءُ اودا درمان ءِ جند نیست اِنت-