شال ءَ کھولانی نندانک: زورانسری آوار جنیانی بگیری ءَ مراگش

بلوچستان ءَ زورانسری آوار جنگ بوتگیں مردمانی کھولاں مروچی چاردہ روچ سرجم انت کہ گورنر کارگس ءِ دیم ءَ نندانک ءِ جتگ ءُ نشتگ انت – بیگواھیں مردمانی کھولاں مروچی دو ھپتگ سرجم انت وھدیکہ نندانک ءَ دگہ بیگواھیں مردمانی کھول ھم آیگ ءُ بھر زورگ ءَ انت – آ چہ سرکار ءُ ھمے ادارھاں چہ وتی دوستیگیں مردمانی یل کنگ ءِ لوٹ ءَ کنگ ءَ انت –

مروچی چار شمبے ءِ روچ ءَ نندانک جاہ ءَ درنگاز کنوکاں زورانسری آوار جنیانی بگیری ءَ مراگش ءِ برجم داشتگ کہ اود ءَ نوابزادہ حاجی لشکری خان رئیسانی، پروفیسر منظور بلوچ، وائس فار بلوچ مسنگ پرسنز ءِ کمک سرکماش ماما قدیر بلوچ ایڈوکیٹ عمران بلوچ طاہر حبیب ءَ ھوار دگہ مردماں بھر زرتگ –

مراگش ءَ تران کنان ءَ آھانی گوشگ ات کہ زورانسری آوارجنی ءِ جیڑہ ءَ انسانی المیہ ءَ یے ھاسکر بلوچستان ءَ اے وڈیں وئیل راجی چکچینی ءِ نیمگ ءَ رؤگ انت کہ اود ءَ مزنیں کچ ءَ نودربر ءُ آھانی استاد ءُ ھر تک ءُ پھناتاں سیادی داروکیں مردم اے زوراکی ءِ آماچ انت ءُ اے درچ ھنگت برجاہ انت کہ اشی ءِ ھلاسی یک ترندیں جھد ءَ بوت کنت –

مراگش ءَ ھواریں مردماں بیگواھیں مردمانی کھول ءِ جھد دروت ندر کتگ – ترانکارانی گوشگ ات کہ بیگواھیں مردمانی کھول ءِ جُھد اے زوراکی ءِ دیم ءَ اُشتاتگ اگاں ناں ریاست ءِ زوراکیاں گیشیں تباھی آؤرتگ ات –

نندانک ءَ ھواریں ءُ مراگش ءَ بھر زوروکاں گوں تران کنان ءَ وائس فار بلوچ مسنگ پرسنز ءِ رھشون ءُ زورانسری آوار جنگ بوتگیں ڈاکٹر دین محمد ءِ زھگ سمی دین ءَ گوشتگ کہ بیگواھیں مردمانی درگت ءَ ھر وڈیں جھد ءُ کوشست ءَ مارا کسی منت گرگی نہ انت زورانسری آوارجنی ءِ جیڑہ راجی جیڑہ یے ءُ بحیثیت ءِ راج مئے سر ءَ پرز بیت کہ اشی ءِ بگیری ءَ جھد بہ کن ایں – مراگش ءَ اتکگیں مھمان اتکگ انت مارا دچار کپتگ انت آھانی آیگ نندانک ءَ نشتگیں کھولانی ھاتر ءَ شریں پیامے کہ آھانی ھمدرد ساڑی انت –

سمی دین ءِ گوشگ ات کہ منی پت سینزہ سال ساری آوار جنگ بوتگ اے سینزدھیں سال منی پانزدہ دمانی تران ءِ تہ ءَ درشان کنگ نہ بنت، سینزدہ سال انت کہ وتی پت ءِ وداریاں پہ انساپ ءِ ھاتر ءَ درسیں در ٹُکیتگاں بلے انساپ نہ رستگ –

سمی دین ءِ گوشگ ات کہ پت ءِ سینزدہ سالانی زورانسری آوار جنی ءُ بیگواھی پہ من ءُ منی کھول ءَ سینزدہ کرنانی کچ ءَ بوتگ انت –

ھمے وھد ءَ بیگواھیں شبیر بلوچ ءِ گھار سیما بلوچ ءِ گوشگ ات کہ ھمک روچ اد ءَ سرکار لھتے نمائندگ کائینت مارا دروگیں تسلی دینت – مارا بازیں سال ءِ بیت کہ اے وڈیں تسلہ گوشدارگ ءَ انت – وھدیکہ ما وتی زھرشانی ءَ برجاہ داریں گڈا مارا جست کنگ بیت کہ شمارا گِس نیست کہ دگانی سر ءَ نشتگ ات – مارا وڈ وڈا ترسینگ بیت زھرشانی ءِ ھلاس کنگے جھد کنگ بیت اِنت –

سیما بلوچ ءِ گوشگ ات کہ ما لاچار انت کہ وتی شیرواریں زھگاں گوں دگانی سر ءَ نشتگ انت مئے گور ءَ گِس ھست بلے مئے دوستیگیں مردماں یل بہ کن ات ما پدا دگبریں ھچبر دگانی سر ءَ نیا ایں –

بیگواھیں مردمانی کھولانی گوم ءَ تران کنان ءَ پروفیسر منظور بلوچ ءِ گوشگ ات مروچی شال ءِ تہ ءَ بلوچ مات بے وسی ءِ اکس جوڈ بوتگ انت – اے ماتانی جھد ءُ جنگ چہ کرناں برجاہ انت – بلوچ زالبولاں ھچ کرن ءَ زلم زوراکیانی بگیری ءَ ھاموش نہ بوتگ انت بلکنہ مدامی اے زوراکیانی بگیری ءَ اوشتاتگ انت –

ایچ ار سی پی شال ءِ رھشون طاہر حبیب ءِ گوشگ ات کہ دگہ ڈیھاں آمیدگسانی کار مردماں ھک ءُ انساپ دیگ انت بلے ادا آمیدگس ءُ کمیشن ترسینگے رند ءَ انت کہ ھر وڈیں شھری ءِ ھاتر ءَ انسانی ھکانی بگیری انت –

ترانکارانی گوشگ ات کہ انساپ گرگ ءِ ھاتر ءَ بلوچ راج ھاسکر سیاسی پاٹی بیگواھیں مردمانی یل کنائینگے ھاتر ءَ جھد ءِ تہ ءَ گیشی بیار انت تانکہ زورانسری آوار جنیانی درچ دارگ بہ بیت –

مراگش ءِ گڈسر ءَ بازیں بیگواھیں مردمانی کھولاں تران کنان ءَ وتی دوستیگیں مردمانی یل کنگے لوٹ کتگ – کھولانی گوشگ ات کہ آھانی نندانک تاں ھما وھد ءَ برجاہ بیت تانکہ آھانی لوٹ منّگ نہ بنت –