بلوچستان نیشنل پارٹی (مینگل) ءِ بنجاھی درشان ءِ تہ ءَ پاکستانی پوج ءِ لیفٹیننٹ جنرل سرفراز احمد ءُ آئی ھمراھانی مَرگ ءِ سر ءَ بژن ءُ پدردی درشان کنگ بیتگ۔
بلوچستان نیشنل پارٹی ءِ بنجاھی پدردی درشانے تہءَ گُشگ بیتگ کہ ھیلی کاپٹر وئیل ءِ تہءَ کور کمانڈر کوئٹہ لیفٹیننٹ جنرل سرفراز احمد ءُ آئی ھمراھانی مرگ ءِ سرءَ اپسوز ءِ درشان کنیں ءُ سانمندیں کھولاں گوں پدردی درشان کنان ءَ دعا کنیں ھاوند آھانی جاھاں وش بہ کنت ءُ پشت کپتگیناں سبر ءُ اوپار بہ دنت۔
گوستگیں روچ ءَ بلوچستان نیشنل پارٹی ءِ سروک سردار اختر جان مینگل ءَ ھم ٹوئٹ یے تہءَ مرتگیں کارندھانی ھاترءَ دعا کُتگ اَت۔
چارشمبے ءِ روچ ءَ پاکستانی پوج ءِ مستر چال ءَ آیگ ءِ وھدءَ ھیلی کاپٹر وئیل ءَ کُشگ بیتگیں لیفٹیننٹ جنرل سرفراز علی ءُ بریگیڈیئر محمد خالد نماز جنازہ ءَ ھوار بیتگ اَت۔
مرتگیں مزنیں پوجی اپسرانی نماز جنازہ ءَ سروزیر بلوچستان، گورنر، مزنیں پوجی ءُ سرکاری اپسراں نے بھر زرتگ رندترءَ پاکستانی آرمی چیف ءَ لیفٹیننٹ جنرل سرفراز علی ءُ بریگیڈیئر محمد خالد ءِ کھول ءَ گوں نیاد کُتگ ءُ پدردی درشان اِتگ۔
آئی ایس پی آر ءِ ردءَ آرمی چیف ءَ گوستگیں ماہ ءَ بلوچ لبریشن آرمی ءِ دستءَ دزگیری ءَ پد کُشگ بیتگیں لیفٹیننٹ کرنل لئیق بیگ مرزا ءِ کھول ءَ گوں ھم نیاد کُتگ۔
یات بہ بیت بلوچ سلاہ بندیں آجوئی لوٹوکانی ھواری گل بلوچ راجی آجوئی سنگر ءَ رسانکدر ءَ شنگ کُتگیں درشانے تہءَ گُشتگ کہ مئے سرمچارانی یک ٹولی ءِ نورانی ءِ کوھی دمگانی تہءَ جُنزگ ءَ بیتگ اَنت، کہ آھاں جھل بال کنوکیں دژمنے ھیلی کاپٹر دستگ اَت، سرمچاراں جھاز بگیریں سلاھاں گوں ھیلی کاپٹر نشانگ کُتگ، کہ اِشی سوب ءَ آئی سک باز تاوان رستگ ءُ ھیلی کاپٹر کپتگ ءُ سرجم ءَ تاوانبار بیتگ وھدیکہ آئی ءَ سواریں دژمنیں پوجے ششیں کارمند ھما دمان ءَ مُرتگ اَنت۔
براس ءِ جارکش بلوچ خان ءَ گُشتگ کہ کُشگ بیتگینانی تہءَ شالءِ کور کمانڈر لیفٹیننٹ جنرل سرفراز علی ھم ھوار بیتگ۔ آ بلوچستان ءَ ملٹری انٹیلجنس ( ایم آئی) ءِ ڈی جی ءُ آئی جی فرنٹیئر کور بلوچستان ساوتھ ھم بیتگ، جنرل سرفراز علی پدری ءَ بلوچ نسل کشی ءُ زورانسری بیگواھیانی تہءَ ھوار بیتگ۔