براس ءَ پاکستانی آرمی ءِ بالگرد ءِ جنگ ءُ دور دیگ ءِ زمّہ واری منّ اِتگ

دژمنیں پوج ءِ بالگرد ءِ نشانگ کنگ ءُ شش پوجی سروکانی کوش ءِ زمہ واری ءَ منّ ایں – بلوچ خان

بلوچ آجوئی لوٹوکیں سلاہ بندیں گلانی یکجاھیں گل بلوچ راجی آجوئی سنگر (براس) ءِ جارکش بلوچ خان ءَ رسانکدر ءَ وتی شنگ کُرتگیں درشان ءِ تہ ءَ پاکستانی آرمی ءِ بالگرد ءِ جنگ ءُ دور دیگ ءِ سرجمیں ھال شنگ کُتگ ءُ گْوشتگ کہ مئے سرمچاراں گْوستگیں روچ ءَ نورانی ءُ وندر ءِ میانی کوھی دمگ ءَ پاکستانی پوج ءِ یک بالگرد ءِ ھما وھد ءَ نشانگ کُرتگ ءُ تاوان داتگ وھدے آ چہ ھمے دمگ ءَ جھل بال کنگ ءَ بیتگ – اُرش ءِ آسر ءَ دُژمن ءِ بالیگ دریجی ءِ کوھی دمگ ءَ موسا گوٹ ءَ کپتگ ءُ تباہ بیتگ-

براس ءِ جارکش بلوچ خان ءَ دیمتر ءَ گوشتگ کہ یک اگست ءِ روچ ءَ براس ءِ سرمچارانی یک ٹولی یے نورانی کوھی دمگ ءَ انچو تر ءُ گرد کنگ ءَ بیتگ،وھدے دُژمن ءِ بالگر جھل ءَ بال کنگ ءَ دیستگ گڑا سرمچاراں بالگرد جنیں سلاھانی سر ءَ بالگرد نشانگ کُرتگ – چریشی ءَ بالگرد ءَ باز تاوان بار بوتگ ءُ تباہ بیتگ بالگرد ءَ سواریں دُژمنیں پوج ءِ شش کارمند ھما جاھ ءَ مُرتگ انت – مُرتگیں کارمندانی تہ ءَ کور کمانڈ 12 کور لیپٹیننٹ جنرل سرفراز علی، ڈاریکٹر جنرل کوسٹ گارڈ میجر جنرل امجد، بریگیڈیئر خالد، پائلٹ میجر سعید، کمک پائلٹ میجر طلحہ ءُ چیپ نائیک مدثر ھوار اِنت-

جارکش ءَ گوشتگ کہ مُرتگینانی تہ ءَ شال ءِ کور کمانڈر لیپٹیننٹ جنرل سرفراز علی ھم ھوار بیتگ کہ آ بلوچستان ءَ لشکری چیریں ادارہ( ایم آئی) ءِ ڈی جی ءُ آئی جی ایپ سی بلوچستان بیتگ – جنرل سرفراز علی تچکی ءَ بلوچ چکچینی ءُ مردمانی زورانسری بیگواہ کنگ ءَ ھوار بیتگ-

آئی ءَ گوشتگ گْوشتگ کہ اُرش ءَ پد مئے سرمچار چہ اے دمگ ءَ پہ سلامتی دراتکگ ءُ وتی مُھکمیں ڈواراں سوبمندی ءَ گوں سر بیتگ اَنت – سرمچارانی پھریزگ ءِ سْوب ءَ براس ءَ زوت اُرش ءِ زمہ واری نہ زُرتگ-

براس ءِ جارکش بلوچ خان وتی درشان ءِ گُڈّی ءَ گْوشتگ کہ بلوچ راجی آجوئی سنگر کول کنت کہ بلوچ راجی توانمندی ءَ یکجاہ کن ایں ءُ دُژمنیں پوج ءِ سر ءَ داں ھما وھد ءَ مزنیں تاوان باریں اُرشاں برجاہ داریں داں وھدے دُژمنیں پوج سرجم ءَ چہ بلوچستان ءَ دراھگ ءَ لاچار نہ بیت ءُ بلوچستان ءِ سرجمیں آجوئی ءَ نہ منّ ایت-