بلوچستان جناح ءَ آزات نہ کُتگ، ما پیش ءَ آزات بوتگ ایں – اسلم رئیسانی

شوانگےءِ پس گار بہ بیت آ دلسیاہ بیت ادا مئے ھمسروئیں انسان بیگواہ کنگ بوتگ انت بیگواھیں مردمانی آوار جنی ءِ امل ایر جنگی انت – اگاں چیریں ادارہ ھمے پھم انت کہ مئے آوار جنی ءُ کُشت کوش ءَ بلوچ راجی زرمبشت ھلاس بیت گڈا باز مشکل انت بوت کنت مئے دیم ءَ ھمے زاھر بہ بیت ما چہ آھانی زوراکی ءَ ترسگائیں بلے مئے دلانی تہ ءَ نفرت گیش بوان انت –

اے گپ بلوچستان ءِ گوستگیں سروزیر نواب اسلم رئیسانی ءَ شال ءَ گورنر کارگس ءِ دیم ءَ بیگواھیں مردمانی کھول ءِ زھرشانی نندانک ءَ جتگ انت –

نواب اسلم رئیسانی ءِ گوشگ ات کہ مردمانی زورانسری آوار جنی امل ھترناک انت اے مئے زھگ ءُ کماشاں شھید کنگ ءَ انت، دھ دھ بیست بیست سالاں بیگواہ کنگ بنت اے کارانی کنگ ءَ بژن کنگ ءَ ھوار زھری ءُ نپرت گیش بہ انت –

آئی ءَ دیمتر ءَ گوشتگ کہ من ھما مردماں گوشگ لوٹاں کہ سرکاری چاریگ انت کہ وتی اے کار ءَ یل بہ دئینت پرچاکہ ما سرکار ءَ پیش چہ شما ھساب گریں – اے وڈیں مردماں ما وتیگی ھم نہ کن ایں کہ کمے زر یک کارڈے ءَ یا سیاہ کانچیں گاڑی ءِ ھاتر ءَ چشیں کار کن انت من ھمے مردماں گوش آں مارا شمے دیمے ءِ سر ءَ ھم زھر کئیت –

آئی ءَ گوشتگ کہ ما نزور ایں بوت کنت مرچی ما ھچ کرت مہ کن ایں بلے ھما زھر کہ مئے دلانی تہ ءَ است انت اے گڈی نہ انت یک مردمے ءِ آوار جنی ءَ پد سدانی کچ ءَ مردم آئی گوم ءَ اوشت انت –

نواب رئیسانی ءَ دلگوش گوں درنگاز کنوکاں کتگ ءُ گوشتگ کہ مروچی اے جنکیں زھگاں اسکول ءُ زانشجاھاں وانگ لوٹیت بلے وتی دوستیگیں مردمانی ھاتر ءَ نندانک ءَ نشتگ انت – یک مردمے ءِ آوار جنی ءِ ھمراھی ءَ آئی ءِ کھول ءَ ھوار ھزاراں مردم ازیت آماچ بیت انت –

آئی ءَ گوشتگ کہ من ھم وت ءَ چہ اے چیریں ادارھاں پھازت نہ کناں، منی برات ھم وت چہ اشاں پھازت نہ کنت – من تچکی ءَ گشاں اگاں مناں چیزے بہ بیت گڈا اشی ءِ زمہ دار آئی ایس آئی انت – مردمانی زورانسری آوار جنوک ھم آئی ایس آئی انت کہ من آھاں گُشاں وتی اے کار ءَ یل بہ دئیت –

آئی ءَ گوشتگ کہ ما اے نگوشیں کہ زورانسری آوار جنگ بوتگیں مردماں یل بہ دے بلکنہ آھاں وتی آمیدگساں بیار اگاں آ کتکار انت گڈا سزا اش بہ دے اگاں یل بہ دے بلے زورانسری آوار جنی ءِ اے کار ءِ کس منوک نہ انت –

نواب رئیسانی چہ انسانی ھکانی میاں استمانی گلاں لوٹ کتگ گوشتگ کہ آ بلوچستان ءَ انسانی ھکانی جاورھالانی تہ ءَ دزمانجنی بہ کنت – ما اقوام متحدہ یا دگہ ادارھاں اے نگوش ایں کہ مئے دوستیگیِ مردماں یل بہ کنائین ایت بلکنہ آھاں جیل ءَ بہ داریت کانودی ھک بہ دنت –

آئی ءَ گوشتگ کہ ھمے مردم اے فیڈریشن ءَ نزور کنگ ءُ تاوان دیگ انت اے فیڈریشن ءِ تہ ءَ بلوچ سندی پشتون ءُ ایندگراں ھک دئیگ آھانی ھک انت – اگاں کسے گوشیت کہ مارا مسٹر جناح ءَ آزات کتگ گڈا ما پیش ءَ آزاتیں استان ءِ بوتگیں کس ءَ مارا آزات نہ کُتگ –

آئی ءَ گوشتگ کہ ما مروچی ھم گوشیں کہ ما اے فیڈریشن ءِ بھر ایں بلے ھمے چیریں ادارھانی مردم مردماں زورانسری آوار جن انت ءُ آھانی کُشت کوش ءَ کن انت ءُ اے فیڈریشن ءَ نزور کنگ لوٹ انت –