وندر: پاکستانی پوج ءِ ھیلی کاپٹر کپتگ، پوجی اپسراں ھوار شش کارمند بیران بیتگ اَنت

بلوچستان ءِ دمگ وندر ءَ پاکستانی پوج ءِ ھیلی کاپٹر کپتگ، ھیلی کاپٹر ءِ کپگ ءِ سوب ءَ لیفٹنٹ جنرل سرفراز علی ءُ بریگیڈیئر امجد ءَ ھوار شش پوجی بیران بیتگ اَنت۔

سربیتگیں ھالانی رد ءَ پاکستانی پوج ءِ ھیلی کاپٹر چہ شال بلوچستان ءَ دیم پہ کراچی ءَ رؤگ ءَ بیتگ ءُ بلوچستان ءِ لسبیلہ دمگ ءَ شش ساھت ءِ بیگواھی ءَ پد وندر ءُ سسی ءُ پنو ءِ مزار ءِ نزیک ءَ کپتگ۔ ھیلی کاپٹراں ھواریں ششیں مردم بیران بیتگ اَنت، ءُ ھیلی کاپٹر ءِ پُرزگ درگیجگ بیتگ اَنت۔

زانگ بہ بیت کہ بیران بیتگینانی تہ ءَ پاکستانی پوج ءِ لیفٹنٹ جنرل سرفراز علی کہ ملٹری کورپس 12 ءِ کماندار، ڈی جی کوسٹ گاڑدبریگیڈیئر امجد حنیف، بریگیڈیئر خالد، میجر سعید پائلٹ، میجر طلحہ پائلٹ نائیک مدثر ھوار اَنت –

دومی نیمگ ءَ لسبیلہ پولیس ءِ ایس ایس پی دوستین دشتی ءَ گوشتگ کہ ھیلی کاپٹر ءِ پٹ ءُ پول انگت ءَ برجاہ اِنت ءُ اشی ءَ کورکمانڈر لیفیٹنٹ جنرل سرفراز علی خان ءَ ھوار شش مزنیں آفیسر سوار بیتگ اَنت-

دومی نیمگ ءَ بلوچستان ءِ سرکار ءِ جارکش فرح عظیم ءَ یک ٹویٹے ءَ گُشتگ کہ آ ھیلی کاپٹر ءِ واتر سلامتی ءِ بارو ءَ وشین ھالانی ودار ءَ اِنت-