بلوچ یکجھتی کمیٹی ءِ کمکی کار برجاہ

بلوچ یکجھتی کمیٹی ءِ کمکاراں ھار ءَ بُرتگیں مردمانی ھاتر ءَ کمکی مڈی بلوچستان ءِ دمگ لسبیلہ ءِ ھند وندر، لاکھڑا، لیاری ءَ ھوار دگہ ھنداں سر کُتگ انت بلے بازیں دمگاں دگانی پُرشگے سوب ءَ رؤگ آھگ بوگ ءَ نہ انت ءُ چریشی ءَ کمکی مڈیانی ٹرک پنس اِتگ انت –

بلوچ یکجھتی کمیٹی کراچی ءِ آرگنائزر ءَ آمنہ بلوچ ءَ بلوچستان ءَ ھار ءَ برتگیں مردمانی ھاتر ءَ چہ مھلوک ءَ کمکے لوٹ کتگ ءُ گوشتگ کہ آ گیش ءَ چہ گیش کمک بہ دئینت – آئی ءَ گوشتگ کہ توپانی ھئوراں بلوچستان ءِ تہ ءَ تباھی کتگ اے گرانیں ساھتاں آھانی ھمراہ داری ءَ بہ کن ایت-

آئی ءَ چاگردی ترامجاھاں وتی تامری درشان ءِ تہ ءَ سرکار ءِ سر ءَ تنکید کتگ ءُ گوشتگ کہ سرکار ءَ ھار ءَ بُرتگیں مردم بے کمک ءَ یل داتگ انت آئی ءَ چہ سردار اختر مینگل ءَ گوں لوٹ کتگ گوشتگ کہ مردمانی کمک ءَ بہ کنت – آ سرکار ءِ بھرے اے وھدی سرکار ءِ زمہ واری بیت کہ ھار ءَ برتگیں مردمانی کمک ءَ بہ کنت –

کراچی ءِ جتا جتائیں ھند ءُ دمگاں کمکی بنجل مروچی سیمی روچ ءَ ھم برجاہ بوتگ انت اے بنجل بلوچ یکجھتی کمیٹی ءِ نیمگ ءَ جنگ بوتگ انت اے وھدی کراچی ءِ تہ ءَ بیست ءَ گیش کمکی بنجل ھست انت –

آھانی بنجاھی بنجل سلمان ٹاور، ملیر کورٹ نزیک انت وھدیکہ جمعہ گوٹھ، ملا عیسیٰ گوٹھ، غازی ٹاؤن،نیو شفیع گوٹھ، فقیر کالونی، کلری، میمن گوٹھ، جوہر موڑ،ابراہیم حیدری، صائمہ گرین سٹی، فائیو اسٹار ٹاور لیاری، کوہی گوٹھ، شرافی گوٹھ ءُ صالح محمد گوٹھ ھم کمکی بنجل ھم برجاہ انت کہ اودا ھار برتگیں مردمانی ھاتر ءَ کمبل، چادر، روگن، دان، ڈال، شکر ءُ دگہ ورد ءُ وراکی ساماناں ھوار زر ھم جما کنگ بوگ ءَ اِنت –