زیارت آپریشن ءُ دروگیں میڑانی تہءَ بیگواھیں مردمانی کُوشکاری ءِ بگیری ءَ بلوچستان ءِ بنجاھی شھر شال ءِ ریڈ زون ءَ برجاھیں بیگواھیں مردمانی کھولانی زھرشانی نندانک گوستگیں دہ روچاں چہ برجاہ اِنت۔
مروچی جماعت اسلامی ءِ امیر سراج الحق ءُ آئی ھمراہ دگہ رھشوناں کھولاں گوں یکجاھی درشان اِتگ ءُ زھرشانی نندانک ءَ بھر زُرتگ۔
اے وھد ءَ آئی ءَ گپ کنان ءَ گُشتگ کہ بیگواھیں مردمانی درگت ءَ پگرمنداں، کھولانی مارشتاں سرپد باں ءُ جماعت اسلامی ءَ ھمک جاہ ءَ بیگواھیں مردمانی کیس چِست کُتگ۔
آئی ءَ گُشتگ کہ پاکستان ءِ راجدپتر ءِ اے درستاں مستریں جیڑہ اِنت، مردمانی بیگواہ کنگ زلم اِنت بلے اے ھم یک مزنیں جیڑہ اِنت کہ وھدے پاکستان ءِ جمھوری پاٹی سرکار ءَ نہ بنت (اپوزیشن ءَ بنت) گُڑءَ آ بیگواھیں مردمانی درگت ءَ گپ کن اَنت بلے ھمے پاٹی وھدے سرکار ءَ کائنت وتی سوگنداں پراموش کن اَنت۔
آئی ءَ گُشتگ کہ بیگواھیں مردمانی جیڑہ بلوچستان ءَ ھوار سرجمیں پاکستان ءَ گندگ بیت، مزنیں کساس ءَ مردم بیگواہ کنگ بیتگ اَنت ءُ دہ دہ سالاں چہ مردم بیگواہ اَنت وھدیکہ آھاں آمید گِسانی دیم ءَ آرگ نہ بیت۔
آئی گُشگ اَت کہ بیگواھیں مردمانی سرءَ کہ کمیشن اڈ بیتگ اَت آئی سروک گیر زمہ وار ءُ بدیں کردیں واھندیں مردمے بیتگ، کھولاں گوں ترندیں لھجہ ءَ گپ کُتگی، بیت کنت آئی دل سنگ ءُ آسن ءِ بیتگ کہ آئی ءَ مردمانی ردءَ نہ جیڑ اِتگ۔
سراج الحق ءَ گُشتگ کہ ما کھولانی اے لوٹ ءِ ھمراھداری کن ایں کہ اگں کسے جرمکار اِنت گُڑءَ آ آمید گِس ءَ آرگ بہ بنت۔ شپانی تھاری ءَ کسے ءَ کُشگ، زھر ءِ تہءَ وتی کجام ھم مردمے بیرانی گرگ ءِ ھاترءَ پیسرءَ چہ دزگیریں مردمانی کُشگ بزدلی اِنت۔
آئی ءَ گُشتگ کہ زیارت ءَ کہ ھما دوازدہ مردم کُشگ بیتگ اَنت آئی سرءَ کمیشن اڈ دیگ ءُ پَٹ ءُ پول کنگ بہ بیت۔