کرمان: ایرانی لشکر ءُ سلاہ بندانی میان ءَ میڑ پنچ مردم بیران

کھنوج ءَ ایرانی لشکر ءُ سلاہ بندانی میان ءَ تیرگواری ءَ لشکر ءِ یک آفیسرے ءَ ھوار پنچ مردم جنگ بیتگ اَنت-

سر بیتگیں ھالانی رد ءَ کھنوج ءِ ھند بھادر آباد ءَ ایرانی لشکر ءَ بیڑ برتگ ءُ اود ءَ تیرگواری ءَ ایرانی لشکر ءِ یک آفیسرے ءَ ھوار پنچ مردم بیران بیتگ اَنت –

ھالانی تہ ءَ گوشگ بیتگ ایرانی لشکر ءِ میان ءَ کُشگ بیتگیں چاریں مردمانی سیادی شھنوازی ٹک ءَ اِنت کہ ھاش ءِ جھمنند گوشگ بیگ ءَ اَنت –

ھالانی تہ ءَ گیش گوشگ بیتگ بھادر آباد ءِ زرباری دمگ ءَ یک پوجی گاڑی ءِ سر ءَ سلاہ بنداں اُرش کرتگ ءُ چریشی ءَ پسھی تیرگواری ءَ چار سلاہ بند جنگ بیتگ اَنت ءُ یک ایرانی آفیسرے ھم کشگ بیتگ –

ایرانی لشکر ءِ رد ءَ سلاہ بنداں گاڑی ءِ سر ءَ اُرش کرتگ ءُ چریشی ءَ پسھی تیرگواری ءَ چار سلاہ بند کشتگ اَنت –

کُشگ بیتگیں مردمانی نام پدر کنگ نہ بیتگ اَنت نانکہ دگہ گلانی نام دیم ءَ اتکگ بلے گوست ءَ ایران ءِ لشکر ءِ سر ءَ گیشتریں اُرش جیش العدل نامیں گلے ءَ منّ اتگ اَنت –

چریشی ءَ پیسر ھم ھمے دمگ ءَ ایرانی لشکر ءُ سلاہ بندانی میان ءَ جنگ بیتگ ات کہ اود ءَ دوازدہ مردمانی زدگ ءُ بیرانی ءِ ھال اتکگ ات اَنت اشانی تہ ءَ شش شھری ءُ یک ایرانی آفیسرے ءِ بیرانی ءُ دگہ پنچ ایرانی لشکر ءِ زدگ بیتگ اِت اَنت-