گوریلہ جنگ – ھُدا وشک ءُ مھمد پاروک بلوچ

نبشتانک: گوریلہ جنگ

نبشتہ کار: ھُدا وشک ءُ مھمد پاروک بلوچ

اولی بھر

دی بلوچستان پوسٹ

دلگوش: چَہ دْروستاں پیسر ما اے نبشتانک ءَ پہ سرجمیں راج ءَ یک ٹیکی یے منّ ایں ءُ ما اُمیت کن ایں اے وانگی ءَ ھر بلوچے دو ءُ سَے رند ءَ وان ایت ءُ دیم ءَ ھر جاہ ءَ روان ئِے ھم کنت کہ بلوچ راج ءَ وتی راجی جُھد ءِ بابت ءَ آگاھی یے بہ رس ایت۔ما شُمئے منّتوار ایں۔
 
اے گپ ءَ ما دْراھیں بلوچ جْوان سرپد ءُ زان ایں کہ دنیا ءِ تہ ءَ ایردستیں راجانی بُنگیج کتگیں چیرجنگ گْوریلہ وار پہ وتی راجی آجوئی ءُ ڈیھ ءِ وتواجھی ءِ جُنزاں سد در سد سوبین بیتگ ءُ زیردستی ءِ سانکل اش سِستگ ءُ آجو بیتگ انت۔ بِل اِت کہ کمیں دیر ءُ کمیں زیت البت سوب اش پَکّ زورتگ ءُ ماں جنگ ءِ پِڑ ءَ یکمُشت بوت ءُ گیدی ءِ بلاھیں بلاھیں زورگِریں زوراکاں پْروش دات بلے لھتیں وتگڑیں چیرجنگ  ھست انت کہ چَہ آیانی نابودی ءُ بے ابرامی ئیں جُھدانی سوب ءَ بے سوب بیتگ انت انچوشکہ ھندوستان ءِ بگیری ءَ کشمیر، ماں اوگانستان ءَ گْوست ءِ وتگڑیں مجاھدین ءُ مرچگیں تالبانانی چیرجنگ ءُ اسرائیل ءِ بگیری ءَ پلستینی اَربانی چیرجنگ کہ آیاں چیرجنگ ءِ نام بدنام کت ءُ ایشانی بے سوبی ءِ بابت ءَ من نبشتانک ءَ گڈی بھر ءَ گپ جن آں۔

پیسر ءَ ما گْوریلہ وار (چیرجنگ) ءِ بابت ءَ گپ جن ایں کہ اے چونیں جنگے ءُ ایشی ءِ راجدپتر ءُ رھبند چے اَنت۔ چوناھیگا اے سپینش گالے کہ ایشی ءِ اولی بَھر کہ “گْورا” انت، بزانت “جنگ” اِنت ئِے ءُ دومی بَھر “یِلہ” ءِ بزانت “ھلاسی” انت بزاں “جنگ ءِ ھلاسی” ھما جنگ کہ درآمدیگی زورگِریں یا زورانسریں دژمن ءَ تئی سر ءَ بُنگیج کت، تئی ڈیھ ئِے ایردست کت، ترا چہ تئی وتواجھی ءَ زبھر ئِے کُت، پہ تئی راجی پجّار ءَ گار ءُ بیگواہ کنگ ءَ تئی چُکچینی ءَ کنگ انت گُڑا تو پہ ھمے جنگ ءِ ھلاس کنگ ءَ دژمن ءِ سر ءَ جنگ بہ کن ئے۔ دومی بزانت ایش انت ئِے کہ چیرجنگ ھما نزوریں راجانی جنگی جُنز انت کہ ایردستیں راج ءِ راجی زرمبشت ءَ سرپد ءُ آگاھیں لس مھلوک بے لب ءُ لالچ ءَ بلاھیں زورآور ءُ ٹوھیں دژمن ءِ بَلدیں لشکر ءِ سر ءَ تْرُند ءُ ھبکّھیں اُرشاں کن انت ءُ دژمن ءَ جانی زَرّی (اِکونومی)، کار ءُ باری تاوان بدے انت کہ دژمن ءَ راج ءِ زیردست کنگ گِران کپ ایت۔

بزاں درآمدیگیں دژمن ءَ ھر وھد ءَ شپ داں روچ وتی مرزی ءِ ھساب ءَ کسانیں جنگانی بیھار ءُ سردردی ءَ بہ دے ئے کہ آئی ءِ جنگی تب پْروش ایت ءُ دل سْیہ بہ بیت، آئی ءَ زیردستی ءِ ھرچگاں گیشتر کنان ءُ بزگ ئِے کن ئے۔ ھمیشی ءِ سان دژمن ءِ راج ءِ لوگ لوگ کپ اَنت کہ دژمن ءِ لس مھلوک ءَ گِرانبھائی بیت ءُ دژمن جند ءِ تہ ءَ پْروش ءِ مارشت ودی بہ بنت ءُ جند ءِ لس مھلوک وتی راجداری ءِ سر ءَ اجب ءُ لاجوابیں سوالاں جُست بہ گِر انت۔

ماں چیرجنگی ءَ گلامیں راجانی کسانیں جنگولی گل دژمن ءِ لشکری کاروان، بُنجل ءُ سنگرانی سر ءَ کمیں وھد ءُ ساھت ءَ اناگتی ءَ تْرُندیں جنگی اُرشاں کن اَنت ءُ ھاسکن ھما جاھاں کہ دژمن ءِ بیرانی ءَ جْوانیں موھے بہ رس ایت، چَہ آئی ءَ پائدگ زُور اَنت ءُ دژمن ءَ گیشتر زیانی دے اَنت۔ توری لد ءُ گیابان بِہ بنت، توری کوھانی گَٹّ ءُ گَرے بِہ بیت یا توری دگ ءُ شھدگے بیت درآمدیں دژمن ءِ جنگی کاروان ماں کسانیں وھد ءِ تْرُند ءُ اناگتی اُرُشانی، جانی تاوان ءُ بیرانی ءِ آماچ بیت ءُ دژمن ءَ انچو بے وانک ءُ ژند بیت کہ دژمن جنگ ءَ گیشتر وتی پھریزگ ءُ پدکِنِزگ ءُ ھیال ءَ بہ کنت۔ گْوریلہ وار ءَ چیرجنگی جنگول وت ءَ را ماں کسانیں کسانیں گالانی تہ ءَ بَھر کن انت ءُ بازیں دمگ ءُ آتراپاں شِنگ ءُ تالان بنت۔ جاورانی تب رِد ءَ وتی جِند ءِ موکل ءُ مرزی ءَ لڈ ءُ بوج کن انت ھچ وڑیں مُلکاری تبک ءِ سانمند نہ بنت۔ بزاں وھدے کہ تئی مُلک ءِ        سر ءَ یک زورانسرے ءَ جنگی اُرشے کُتگ گُڑا پہ ھمے جنگ ءِ ھلاسی ءَ ترا جنگ کنگی اِنت ءُ گوریلہ جنگ ءِ مانا ھم ھمیش انت ءُ انچوشکہ انگریزی ءَ گْوش اَنت
To finish an imposed war you have to go for a war 
نی ما چیرجنگ ءِ تبکانی بابت ءَ گپ کن ایں کہ منی جِند ءِ پٹ ءُ پولکاری ءِ ھساب ءَ چیرجنگ دو رنگ ءِ بنت یکے کہ چیرجنگ ءِ گل وتی جِند سرکار ءِ زالمیں سرکار ءِ ھلاپ ءَ بُنگیج کنت ایشی ءَ را ما مُلکاری شست ءِ چیرجنگ گْوش ایں ءُ دومی کہ یک نزوریں راجے ءِ ڈیھ ءَ یک زورگریں درآمدگ ءُ زورآوریں راجے ءَ زیردست کت۔ وھدے ایردستیں راج گوں ھمے درآمدگیں زورانسر ءَ ھچ وڑیں سْیادی یے نہ دار ایت ناں کہ زبان ءُ دودمان ءُ نیکہ دود ءُ ربیدگ ءِ نزیکی یے ھست انت ئِے گُڑا ھمے گلامی ءِ سانکلانی سِندگ ءِ سِلاھبندیں جُنز ءَ چیرجنگ گْوش انت۔ راجی آشوب ءُ زرمبش ءِ چیرجنگ مُدام سوبین بیتگ اَنت لھتیں سوبین بیتگیں چیرجنگانی درور ایش انت کہ چہ 1953 تاں 1958 ءَ پیڈل کاسٹر ءُ چیگویرا ءِ سرکماشی ءَ کیوبا ءِ لشکری پُلامرزی ئیں زورانسری ئیں پاگواجہ پُلجینسیو بٹیسٹا ءِ بگیری ءَ چیرجنگ سوبین بوت ءُ چہ ھمے جنگ ءَ چیرجنگ ءَ بے کساس وشنامی یے گپت۔

روان اِنت۔۔۔۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔