پنجگور: پوج ءُ سلاہ بندانی میان ءَ ٹوھیں میڑ، ھردو نیمگاں جانی تاوان ءِ ھال

سربوتگیں ھالانی رِد ءَ بلوچستان ءِ دمگ پنجگور ءَ پاکستانی پوج ءُ سلاہ بندانی میان ءَ میڑے بوتگ، شش مردمانی بیرانی ءِ ھال انت –

گیشیں ھالانی رِد ءَ پنجگور ءِ دمگ پروم ءَ پاکستانی پوج ءُ سلاہ بندانی میان ءَ میڑے بوتگ چریشی ءَ شش سلاہ بندیں مردماں ھوار پوجی کارمندانی مرگ ءِ ھال انت –

دمگی اھوالکارانی رِد ءَ اے میڑ ءَ زمینی پوج ءَ ابید بالگرداں ھم بھر زرتگ وھدیکہ دمگی مردماں تیرانی توار ھم اشکُتگ انت –

بیران بوتگیں مردمانی پجار ھنگت نہ بوتگ انت ءُ ناکہ پاکستانی پوج آئی ایس پی آر ءَ اے درگت ءَ درشان داتگ –

اھوالکارانی رِد ءَ بیران بوتگین مردمانی سیادی چہ بلوچ آجوئی لوٹوکین سلاہ بندیں گلان انت بلے تنی وھدی سلاہ بندیں گلانی نیمگ ءَ ھم اے درگت ءَ ھچ وڈیں درشان دیگ نہ بوتگ –