مستونگ ءَ بی ایل اے ءِ دو باسک دزگیر کتگ انت – سی ٹی ڈی ءِ ٹاہ

کاؤنٹر ٹیررزم ڈپارٹمنٹ (سی ٹی ڈی) رسانکدراں وتی شنگ کرتگیں درشان ءَ ٹاہ داتگ کہ سی ٹی ڈی بلوچستان ءَ ھمے ھپتگ ءَ یک شمبے ءِ روچ ءَ مستونگ ءِ دمگ شیرین آب دگ ءَ رحیم بخش ء سنجر خان ءُ بہاول خان ء جمعہ خان محمد حسنی جھمنند کھڈکوچہ دزگیر کتگ انت –

سی ٹی ڈی ءِ رِد ءَ دزگیر کنگ بوتگیں ھردو مردمانی سیادی بلوچ آجوئی لوٹوکیں سلاہ بندیں گل بلوچ لبریشن آرمی انت –

سی ٹی ڈی ءِ واکدارانی رِد ءَ دزگیر کنگ بوتگیں مردمانی گور ءَ مزنیں کچ ءَ مواد دست کپتگ ءُ شال سی ٹی ڈی تانہ ءَ آھانی ارزی نبشتہ کتگ وھدیکہ جست پُرس ءِ میان ءَ آھاں سنگت ءُ کارانی درگت ءَ ھم گوشتگ کہ آھانی کارانی تہ ءَ بیست ءُ نُھ مئی دوھزار پانزدہ ءِ مستونگ ءِ دمگ کڈکوچہ ءَ بیست پشتونانی کوچ ءَ ایرگیجگ ءُ آھانی کوش ھم ھوار انت –

واکدارانی رِد ءَ دزگیریں مردماں کولپور ءَ گیس پائپ لائن سر ءَ اُرش، کشتری ءَ کریش پلانٹ مشین ءِ تباہ کنگ ءُ جوھان ءَ لیویز ءِ سر ءَ بوتگیں اُرش ھم منّ اِتگ انت –

آئی ءَ گوشتگ کہ بی ایل اے ءِ دزگیر کنگ بوتگیں اے باسکاں اے ھم منّ اِتگ کہ آھاں ایف سی ءُ پوجی پانگسانی سر ءَ اُرش کُتگ وھدیکہ گیشیں پٹ پول بوگ ءَ انت –

دومی نیمگ ءَ ھمے گوشگ بوگ ءَ انت کہ مستونگ ءِ پشتون مساپرانی کوش ءِ زمّہ واری بی ایل اے ءَ نہ منّ اِتگ وھدیکہ اے اُرش ءِ زمّہ واری یک دگہ گل ءَ منّ اِتگ ءُ مہران مری ءَ ھوار دگہ بلوچ گلانی رھشوناں اے وئیل ایرجتگ –

زانگ بہ بیت سی ٹی ڈی ءَ پیش ءَ ھم بلوچستان ءِ بازیں دمگ ءَ مردمانی دزگیری ءَ دروگیں میڑے نام ءَ آھانی کوش ءِ ٹاہ داتگ – گوست ءَ بوتگیں اے وڈیں وئیلاں جنگ بوتگیں مردم پیش ءَ زورانسری آوار جنگ ءُ بیگواہ کنگ بوتگیں مردم بوتگ انت –

ھمے ماہ ءَ ھژدہ جولائی ءَ سی ٹی ڈی ءَ بی ایل اے ءَ سیادی داروکیں مردمے ءِ دزگیر کنگے ٹاہ داتگ ات کہ آئی پجار غوث بخش ء علی خان لانگانی مری جھمنند مری کیمپ ہزار گنجی شال ءِ نام ءَ چہ بوتگ ات –

بلے پدا ھم دی بلوچستان پتر ءَ سربوتگیں ھالانی رِد ءَ غوث بخش ء علی خان مری پاکستانی پوج ءَ نُھ اگست دوھزار بیست ءُ یک ءَ یک شمبے ءِ روچ ءَ شاھرگ ءِ دمگ گھوسٹ زورانسری آوار جتگ ءُ بیگواہ کتگ بیتگ –