بلوچستان ءِ دمگ نال ءَ بلوچ اسٹوڈنٹس ایکشن کمیٹی ءِ نیمگ ءَ یک زانشتی دیوانے برجم دارگ بیتگ-
دیوان نال ھائی اسکول ءَ برجم دارگ بیتگ کہ اود ءَ بازیں کچے ءَ نودربران بھر زرتگ ءُ دیوان سرجم کتگ –
دیوان لبزانک ءُ زانشتی تکاں بندوک بیتگ ءُ چریشی ءَ بساک ءِ رھشوناں جتا جتائیں پھناتاں وتی وتی لیکہ ءُ ھیال درشان کتگ اَنت-
بساک ءِ نیمگ ءَ نال ءَ ھوار بلوچستان ءِ جتا جتائیں جاھاں زانشتی نیاد یکشل ءَ برجم دارگ بیگ ءَ اَنت چریشی ءِ بساک ءِ لوٹ اِنت کہ آ بلوچستان ءَ پشکپتگیں نودربرانی دیمروئی ءِ ھاتر ءَ جھد ءَ اِنت –
بلوچستان ءَ ابید کراچی ءُ دگہ ھند ءُ جاھاں ھم بساک ءِ نیاد گندگ ءَ کاینت کہ اود ءَ کتاب ءُ دگہ دگہ چیزانی سر ءَ بساک وتی جھد ءَ کنگ ءَ اِنت-
نیاد ءَ ھواریں بساک ءِ تران کنوکاں گوشتگ کہ چوشین پرارزشتیں نیاد بلوچستان ءِ جتا جتائیں ھند ءُ دمگاں دیم ءَ ھم برجم دارگ بنت کہ دانکہ نودربراں جوانیں سسا ءُ زانت سر بہ بیت اِنت-