شال: زیارت وئیل ءِ بگیری ءَ زھرشانی برجاہ

زیارت وئیل ءِ بگیری ءَ شال ءَ بلوچستان گورنر کارگس ءِ دیم ءَ زھرشانی نندانک مروچی ھم برجاہ بوتگ –

وائس فار بلوچ مسنگ پرسنز، نیشنل ڈیموکریٹک پاٹی، بلوچ یکجھتی کمیٹی، بلوچ ویمن فورم ءِ چیردستی ءَ بیگواھیں مردمانی کھولاں مروچی چار روچ سرجم بوتگ انت کہ بلوچستان گورنر کارگس ءِ دیم ءَ نندانک ءِ جتگ ءُ نشتگ انت – پشتون رھشون ءُ اسمبلی ءِ باسک محسن داوڈ ءَ نندانک ءَ بھر زرتگ ءُ دلپدردی درشان اتگ –

شال ءَ زیارت وئیل ءِ بگیری ءَ زھرشانی کنوکاں گوستگیں روچ ءَ پریس کانفرنس کنان ءَ سرکار ءَ سے شمبے وھد داتگ کہ سرکار آھانی لوٹاں بہ منّ ایت – درانگاز کنوکانی گوشگ انت کہ اگاں سَے شمبے ءِ روچ ءَ تان مئے لوٹ منّگ نہ بوتاں گڈا سرجمیں بلوچستان ءَ زھرشانی ءِ درچ ءِ بندات بیت اِنت –

زھرشانی ءَ نندوکیں درانگاز کنوکانی گوشگ انت کہ زیارت ءَ پوج ءَ لشکر کشی ءِ میان ءَ زورانسری آوار جتگیں مردم دروگیں میڑ ءِ نام ءَ کُشتگ انت –

درانگاز کنوکاں بلوچستان ءِ سرکار ءِ دیم ءَ سَے لوٹ ایر کرتگ انت کہ زیارت وئیل ءِ سر ءَ جوڈیشل کمیشن اڈ دیگ، درسیں بیگواھیں مردمانی وش ءُ سلامتی یل کنگ ءُ بیگواھیں مردمانی کھولاں باور کنائینگ کہ دیمتر ءَ زورانسری آوار جنگ بوتگیں مردم دورگیں میڑ ءِ نام ءَ کُشگ نہ بنت – درانگاز کنوکاں اے لوٹانی منگ ءِ ھاتر ءَ سرکار سَے روچ ءِ الٹی میٹم داتگ –

دومی نیمگ ءَ بلوچستان ءِ سرکار ءَ درنگاز کنوکانی اے گپ رد کُتگ انت – گوستگیں روچ ءَ اھوالکاراں گوں تران کنان ءَ بلوچستان سرکار ءِ جارکش فرح عظیم شاہ ءَ گوشتگ کہ زیارت وئیل ءِ درگت ءَ ھما وڈ کہ گوشگ بوگ ءَ انت اے راست نہ انت – پھازگی لشکر بے سوب ءَ کس ءَ نہ کُش انت – آئی ءِ گوشگ ات کہ مئے وزیر درانگاز کنوکاں گوں ھال کنگ ءَ انت ءُ یکرندے گند ءُ نند ھم بوتگ زیارت وئیل ءَ دروگیں میڑے نام دیگ جوان نہ انت –

بیگواھیں مردمانی کھولاں ھوار زیارت ءَ وئیل ءَ جنگ بوتگیں مردمانی کھول سرکار ءِ ٹاہ ءَ دروگ گوشگ انت – درنگاز کنوکانی گوشگ انت کہ مارا سَے روچ انت کہ بلوچستان گورنر کارگس ءِ دیم ءَ زھرشانی کنگ ءَ انت تنی وھدی سرکار ءِ نیمگ ءَ ھچ وڈیں ٹولی ءِ نہ اتکگ ءُ سنجیدگی ءَ گند ءُ نند ءِ کوشست نہ کتگ دومی نیمگ ءَ سرکاری وزیر دروگیں پریس کانفرنس کنگ ءَ انت –

نیشنل ڈیموکریٹگ مومنٹ ءِ چیرمین ءُ اسمبلی باسک محسن داوڈ، پاٹی ءِ بنجاھی سیکٹری جنرل مزمل شاہ، سوبائی سدر احمد جان لالا ءَ مروچی اتکگ ءُ گوں آھاں دلپدردی درشان اتگ –

زھرشانی ءَ نشتگیں مردمانی گوم ءَ تران کنان ءَ پشتون رھشون ءِ گوشگ ات کہ زیارت ءِ وئیل ریاستی ناشرکای یے کہ آئی ءِ درور جمھوری ریاستانی تہ ءَ دست نہ کپیت – زیارت ءِ دابیں وئیل ھمک روچ پشتون ءُ بلوچ دمگاں بوگ ءَ انت کہ آھانی گر ءُ دار ءِ ھاتر ءَ سیاسی جھد المی انت –

محسن داوڈ ءِ گوشگ ات کہ زیارت ءِ دابین وئیل ایردستیں راجاں ھچبر چہ وتی جھد ءَ پد نہ کنزین انت – ریاست اے وڈ چلائینگ نہ بنت – زوراکیانی بگیری ءَ بلوچ ءُ پشتون وتی جھد ءَ برجاہ دار انت – ریاستی ادارھاں لوٹ ایت کہ اے راجاں ازت ءُ آزاتی ءَ زند گوزینگے ھک ءَ بہ دئینت –