نبشتانک: سیاست چے یے؟
نبشتہ کار: ابدلستار بُگٹی
دی بلوچستان پوسٹ
وھدے کہ 2004 ءَ من دوازدہ پاس کُت گُڑا من بلوچستان یونیورسٹی ءِ پولیٹیکل سائنس ءِ ڈیپارٹمنٹ ءَ اڈمیشن زُرت، یک ماھے ءَ لھتیں کلاس ءَ بھر زُرت ءُ انڈیائی کتابے ءِ پولٹیکل سائنس ءِ درونت ونتگ ءُ پد ءَ سرپد بیتگ آں کہ اے پولٹیکل سائنس من ءَ پاکستان ءِ تہ ءَ ھچ وڑیں پائدگے نہ دنت گُڑا من شال ءَ بیوٹمز یونیورسٹی ءَ ٹیل ءُ گیس ءِ انجینئرنگ ڈیپارٹمنٹ ءَ باسکی زُرت ءُ پیٹرولیم انجینئرنگ کُت۔ البت ھمے لھتیں ماہ ءَ پولیٹکل سائنس ءِ وانگ ءُ پد ءَ بلوچ نودربری گل( بی ایس او) ءِ تہ ءَ بوگ ءَ کمیں سرپد بیتگ آں کہ پولیٹکس چے ءَ گْوش اَنت۔ گِند ئے پولیٹکس یک لاتینی لبزے کہ مانا ئِے شھر ءِ جُنزینگ ئیگ اِنت۔ بزاں یک شھرے تو انچیں دابے ءَ پھریز ءُ ھزمت کن ئے کہ مھلوک ءَ شھر ءَ آپ، لائین(بجلی)، نادْراھجاہ ءُ وانگجاھاں ھوار ھر وڑیں آسراتی بہ رس ایت۔ پد ءَ ھمے کار چہ شھر ءَ در کپت ءُ مُلک ءِ ھزمت کنگ ءِ نام بیتگ۔ دُنیا ءِ مزنیں یونیورسٹیاں الیکٹریکل، مکینیکل، سیول انجینئرنگ، پیٹرولیم انجینئرنگ، کیمیکل انجینئرنگ، آئی ٹی، ایکونومکس ءُ ایم بی بی ایس ءِ وڑ ءَ پولیٹکل سائنس ءِ ڈیپارٹمنٹ ھم بنت کہ چہ اود ءَ دُنیا ءِ بلاھیں رھشُون ودی بنت۔
دُنیا ءِ ھر زُبان ءَ پولیٹکس ءَ وتی زگریں نامے بیت انچوشکہ نیپال، بنگالی ءُ ھندی ءَ راجنیتی، اربی، پارسی، پشتو، ترکمانی ءُ کُردی ءَ سیاست یا سیاسیہ ءُ بلوچی ءَ مُلکاری ءُ راجکاری ھم گْوشگ بیت۔ بزاں راجکاری تھنا راج ءُ مُلک ءِ ھزمت ءِ نام اِنت انچوش کہ ڈاکٹری، انجینئرنگ، ناھُدائی(Air Pilots)، لشکری(Military)، کارجاھی(industy)، بینکنگ ءُ زرکاری(Economy) ءِ وڑ ءَ راجکاری ھم زِند ءِ پھناتے (یک پروپشنل پیلڈے)، بلکیں یک پاک ءُ نیکیں کارے کہ آئی ءِ بُنکی مول ءُ مُراد پہ وتی راج ءُ مُلک ءِ ھزمت کنگ ئیگ انت۔ پہ بنی آدم ءَ سُکھ ءُ آسودگی ودی کنگی اَنت۔ دُنیا ءِ ھر مُلک ءَ راجکاری پاٹی بنت کہ ھر باسکے وتی پاٹی ءِ سسّا(Ideology) ءِ سر ءَ مُھکمی ءَ اوشت ایت۔ یک راجکارے ءَ وتی مُلک ءُ راج ءِ ھر مُشکلانی آسان ءُ جیڑھانی توجیلّ دیگ بودی ھم المی اِنت۔ گِرانبھائی ءِ سر ءَ کار، جنگ ءُ زرکاری ءِ بدھالی ءَ شریں سوڑگ(فیصلہ) زِیرگ ءُ راج ءُ مُلک چہ ھر وڑیں تباھی ءَ پھریزگی اَنت۔
گِند ئے راستیں درنگازی ءَ راجکاری مُلکاں چہ گُلامی ءَ آجوئی دنت ءُ آزاتیں راجاں دیمروئی دنت پمیشکا واجہ ولادیمر لینن ھم یک راجکارے اَت کہ 1918 ءَ روسی راج چہ زار باشاہ ءِ گُلامی ءَ آجو ئِے کنائینتگ، جوسپ اسٹالین ھم یک راجکارے اَت کہ وتی راج ءَ بے کساس دیمروئی ئِے دات ءُ جرمنی ءَ پْروش ئِے دیائینت۔ چی گویرا ءُ سُباش چندر بوس ھم راجکار اَت اَنت، گاندھی ءُ نھرو ھم راجکار ات اَنت۔ واجہ ابدلکلام آزات ھم ھندوستان ءِ راجکارے اَت کہ آئی ءَ ھمدوستان ءِ ایجوکیشن ءَ بلاھیں آشوبے داتگ، بانُک اِندرا گاندھی ھم یک راجکارے اَت، واجہ مَن موھن سنگھ ھم راجکارے کہ آئی ءَ ھندوستان ءِ زرکاری(Economy) ءَ بلاھیں دیمروئی داتگ، مرچیگیں روسی مھتر واجہ وِلادیمر پوٹن ھم راجکارے کہ چہ 1992 ءَ سوت یونین ءِ بھر ءُ بھانگ پد روس یک سُپر پاورے جوڑ کُت ئِے۔ واجہ نیلسن منڈیلہ ھم یک راجکارے اَت۔ مھتر یوسپ الیہ سلام ھم راجکارے ءَ اَت کہ مِسر چہ ڈُکّالی ءَ پھریز ات ئِے۔ مھتر مھمد ءُ مھتر اَلی ھم راجکار اِت اَنت۔
توری آسٹریلیا، نیوزی لینڈ، پِنلینڈ، سیوزرلینڈ، انگلینڈ، ملائیشا ءُ انڈونیشا بہ بیت یا توری جرمنی، روس، پرانس، امریکہ، جاپان، کوریا، چین، انڈیا ءُ بنگلادیش بہ بیت دُنیا ءِ ھر مُلک ءَ راجکار ھست اَنت ءُ چہ راجکاری ءَ رھشُون ودی بنت۔ ھمے رھشُون ءُ راجکارانی جُھد مُدام ھمے بیت کہ ما وتی مُلک ءُ راج ءِ ھزمت ءَ کن ایں، پہ مُلک ءِ سیت ءُ پائدگ ءَ پدکِنِزگی نہ اِنت بلکیں پہ کُربانی ءَ ساڑی بوگی انت۔ راجکاراں اوپار ءُ مِچورٹی سک باز بیت۔ دُنیا ءِ مُلکاراں دْروگ، دْروہ(دھوکہ) ءُ سِلکاری(کرپشن) یک سْیاسی وتکُشّی یے بیت۔ اگاں ما مرچیگیں زمانگ ءِ مُلکاراں گِند ایں گُڑا مارا چہ اِنڈیا ءَ واجہ نتیش کُمار، ھُدامُرزی اٹل بھیاری واجپائی، اروند کیجروال، بانُک میاوتی، یوگی ادھتیانات ءُ شری نرندر مودی ءِ وڑیں مُلکارانی بارو ءَ وانگ لوٹ ایت کہ اے چون بزگیں مردم اِت اَنت، چہ ایشاں بازیناں سوُر نہ کُتگ ءُ لھتیناں زھگ ودی نہ کُتگ بلکیں شپ داں روچ وتی پاٹی ءِ مُھکمی ءُ راج ءُ ملک ءِ ھزمت ءَ زِند اش گْوازینتگ۔ بنگلادیش ءِ مھتر بانُک شیک ھسینہ ھم یک مُلکارے کہ آئی ءَ وتی راج ءِ تہ ءَ نیکراھی سیاست ءُ پوج ءِ زورانسری ءَ لگام ئِے داتگ چریشی ءَ مرچی بنگلادیش ءِ جی ڈی پی پر کپیٹا 2400 ڈالر انت ءُ مُلک ءِ ڈنی مڈی(Forein Reseves) 60 بلین ڈالر اَنت۔
نی ما پاکستانی سیاست ءِ سر ءَ لھتیں ٹوک کن ایں کہ پاکستانی سْیاسداناں ناں چہ یونیورسٹیاں پولیٹکل سائنس ونتگ ءُ ناں کہ اکنومکس ءِ زانتے ھست انت اش۔ بلکیں پاکستانی سْیاسدان دْراہ سندھ ءِ وڈیرہ، لینڈلارڈ، پنجاب ءِ چوھدری، انڈسٹرالسٹ، پشتونستان ءِ مناپکیں مُلا ءُ بلوچستان ءِ لھتیں کاسگ چٹ ءُ وتگڑیں دمگی سردار، میر ءُ نواب اَنت ناں کہ پاکستانی سْیاستدان دُنیا ءِ دگہ راجکارانی وڑ ءَ راجدوست ءُ مُلکار اَنت۔ دُنیا ءِ سیاست ھمے وڑ ءَ نہ اِنت کہ پاکستان ءَ چہ 1948 ءَ بیگ ءَ اِنت۔ چوناھا پاکستانی سْیاست ءَ پوج کنٹرول کنگ ءَ اِنت۔ پاکستانی سْیاست ءَ دْروگ، دْروہ، دوتل پُستی(مُناپِکت)، سِلکاری المی انت۔ اگاں پاکستانی سْیاسداناں مُلکاری ءِ بودی یے بوتیں پاکستان ءَ 1962 ءَ اپریشن جبرالٹر ءِ وڑیں جنگی رَدی نہ کُتگ اِت اَنت، 1971 ءَ پْروش ئِے مہ وارتیں، پد ءَ 1980 تاں 1989ءَ پہ لب ءُ لالچ ءَ ماں اوگانستان ءَ امریکہ ءُ سوت یونین ءِ جنگ باسکی ئِے مہ زُرتیں، 1998-99 ءَ کارگِل جنگ ءَ پْروش ئِے نہ وارتگ اَت۔ پد ءَ 2001 تاں 2020 ءَ پہ ڈالر ءِ لالچ ءَ وتی 80 ھزار مردم ئِے نہ کُشائینتگ اَت۔ ھمے پاکستانی سْیاسدانانی نابودی ءِ آسر ءَ پاکستان پشتون ءُ بلوچ ولایتاں چیرجنگ ءِ آماچ اِنت۔ واپاری زرداری، مُلا ڈیزل، چوباز شریپ، مُناپک ءُ بُزدل امران ھان ءُ بے گیرتیں شاہ مھمود کریشی ءِ وڑیں پاکستانی مُلکاراں پاکستانی سْیاست ءَ سِلکاری ءُ دْروگ البار کنائینتگ ءُ مرچاں پاکستان ءَ سْیاست ھیرامنڈی ءِ نام اِنت پمیشکا مرچی پاکستان 140 بلین ڈالر ءِ وامدار اِنت، مرچیگیں روچ ءَ ڈالر ءِ نھاد 232 اِنت ئِے ءُ ڈنی مڈی 9.3 بلین ڈالر اَنت۔
البت چہ ھمے 9.3 بلین ڈالر ءَ 6.2 بلین چینی وام ءُ 4.7 سھودی اَرب ئیگ اَنت بزاں جِند ءَ کلدارے ھم نیست اِنت ئِے، ھزانگ ئِے ھالیگ اِنت۔ گِند ئے پاکستان مرچاں سد در سد سری لنکا ءِ وڑ ءَ کنگلا اِنت۔ پاکستانی ایمّیچور لیڈرانی وڑ ءَ پاکستانی مھلوک ھم بے سسّا اَنت۔ آیانی تہ ءَ ھچ وڑیں راجدوستی ءِ سسّا نیست کہ سری لنکا، ترکمانستان، مِسر ءُ تُرکی مھلوک ءِ وڑ ءَ وت ءَ پہ آشوب ءَ تیار کن ایں۔ لھتیں پاکستانیانی ٹوکاں کسے اشکُن ایت گُڑا کَندگ کیت گْوش اَنت “زرداری پاکستانی سْیاست ءِ بے تاج بادشاہ اِنت” گُڑا بی بی سی گْوش ایت “پہ زرداری ءِ سْیاست ءِ پھمگ پی ایچ ڈی کنگ لوٹ ایت”
بزاں ایشانی ھیال ءَ زرداری سْیاست کنگ ءَ اِنت! بلکیں اگاں کسے ءَ راجمستری(Democracy) ءُ راجکاری ونتگ گُڑا آ وت سرپد بیت کہ اِے سْیاست نہ انت بلکیں اِے راجدروھی انت چی ءَ کہ ھمے وڑیں سْیاست ءَ ناں مُلکے راج ءَ پائدگے رس ایت ءُ ناں کہ مُلک ءَ دیمروئی کنت بلکیں گھتر بیرانی بیت انت۔ راج ءِ رَد دیگ، بزگیں مھلوک ءِ ھک جنّگ، سِلکاری کنگ، پندل سازگ، سسّا ءَ گوں زراں بھا کنگ، دْروگبند ءُ دْروہ کنگ ءِ نام پاکستانی سْیاست اِنت۔ ٹوک ءِ ھلاسی ءَ گْوش آں بے رھبندیں پاکستان مرچاں بے رھشُون اِنت ءُ پاکستان ءَ مرچی ھچ بودی نیست کہ پہ وتی بزگیں راج ءَ وڑیں بہ کنت۔
پاکستانی سْیاست ءَ دُنیا ءِ نیک ءُ پاکیں راجکاری ءُ مُلکاری ءِ بدنام کُتگ باید اِنت ما سْیاست ءِ جِند ءَ پھم ایں کہ سْیاست چے ءَ گْوش اَنت، ما وت ءَ چہ ھمے وڑیں سْیاست ءَ دِیر بدار ایں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔