بلوچستان: چار مردم یل، دگہ سَے زورانسری آوار جنی ءَ پد بیگواہ

مستونگ ءَ زورانسری آوار جنگ بوتگیں شھید سنگت سناء بلوچ ءِ برات ءُ وارس یل کنگ بوتگ انت –

ھالانی رِد ءَ بلوچستان ءِ دمگ کیچ تمپ ءَ پاکستانی پوج ءَ دو ورنا زورانسری آوار جتگ ءُ بیگواہ کتگ انت کہ آھانی پجار سدیر ء رحیم بخش ءُ نوید ء حمید ناماں چہ بوتگ انت –

کیچ ءَ پوج ءِ دست ءَ زورانسری آوار جنگ بوتگیں ورنایانی کھولاں وتی دوستیگین مردمانی آوار جنی ءِ ھال راست کُتگ ءُ گوشتگ کہ ھردو ورنا وت ماں وت ناکو زتک انت کہ پوج ءَ زورانسری آوار جتگ ءُ بیگواہ کتگ انت –

دومی نیمگ ءَ پوج ءِ دست ءَ زورانسری آوار جنگ بوتگیں سیمی مردمے پجار بجار خان مری جھمنند کلی کمالو ءِ نام ءَ چہ بوتگ کہ دو روچ ساری چہ شال مری آباد ءَ آوار جنگ بوتگ –

زانگ بہ بیت چار روچانی میان ءَ شال، خاران ءُ کیچ ءَ شش مردم زورانسری آوار جنگ ءُ بیگواہ کنگ بوتگ انت کہ آھانی تہ ءَ دھمی تبک نودربر سعود عاقب، چہ ھاران ءَ غلام جیلانی حسین زئی ءُ محمد ابراہیم مینگل ءِ نام ھوار انت –

گوستگیں روچ ءَ مستونگ ءَ پوج ءِ دست ءَ زورانسری آوار جنگ بوتگیں عطاء اللہ شاہوانی، عبیداللہ شاہوانی ءُ آھانی وارس مجیب الرحمان شاہوانی ءَ عبدالخالق شاہوانی مروچی یل بوتگ ءُ وتی گس ءَ سربوتگ انت کہ ھر چاریں مردم پوج ءَ چہ جندے گِس ءَ بیڑ برتگ ءُ آوار جتگ بوتگ انت –

چہ ھارانی ءَ زورانسری آوار جنگ بوتگیں غلام حسین جیلانی ءِ کھول زیارت وئیل ءِ بگیری ءَ زھرشانی کنوکانی ھمراھی ءَ گون انت ءُ شال ءِ زھرشانی برجاہ انت –

بیگواھیں غلام حسین جیلانی ءِ کھول ءِ گوشگ انت کہ اے اولی رند نہ انت کہ مئے گوم ءَ اے وئیل بوتگ گوستگیں دھک ءَ گیش انت کہ مئے کسان سالیں زھگ ءُ کماش آوار جنگ بوگ ءَ انت – چادر ءُ چاردیوالی ھم لگتمال کنگ بوگ ءَ انت مئے زھگ ءُ زالبول نہ کتگیں گناھانی سزا ءَ سگگ انت اے ناکہ دمگی مردمانی بلکنہ انسانی ھکانی لگتمالی یے –

آھاں درسیں ملکی ادارھاں چہ لوٹ کتگ کہ ما پُرایمنیں مردمیں مارا اے وڈ گار کنگ مہ بیت – ما درسیں انسانی ھکانی منوگراں گوں دزبندی کنیں کہ غلام جیلانی ءِ گیرکانودی آوار جنی ءِ بگیری ءَ توار چست بہ کناں –