کنفوشس انسٹی ٹیوٹ سر ءَ اُرش ءَ، کمک کارے ءِ اکس جوڑ کنگ بوتگ

کنفوشس انسٹی ٹیوٹ ءَ بوتگیں وتکشیں بمب تراک ءَ گیشیں پٹ پولی ءِ ٹاہ دیگ بوگ ءَ انت –

پولیس ءِ رِد ءَ اُرش ءَ ھواریں مستریں کمک کار زیب ءِ اکس جوڑ کنگ بوتگ کہ سی ٹی ڈی ءَ چہ سی سی ٹی وی ءُ چم دیستیں گواھانی کمک ءَ جوڑ کتگ –

پولیس ءِ گوشگ انت کہ کنفوشس انسٹی ٹیوٹ کراچی ءَ وتکش تراک ءَ کارمرز بوتگیں بیگ زیب ءَ جوڈ کتگ ءُ آ کراچی ءِ دمگ دہلی کالونی ءَ کتکار ھیبتان ءِ کھول ءِ لوگ ءَ بوتگ-

پولیس ءَ ٹاہ داتگ کہ زیب بی ایل اے مجید برگیڈ ءِ پدائیاں ٹریننگ دنت –

سی ٹی ڈی ءِ ریکارڈ ءِ رِد ءَ اے مرد بزاں زیب بروہی بلوچ یے ءُ آئی ءِ اُمر بیست ءُ شش سال انت آئی ءِ بُرزی پنچ فٹ ءُ ھپت انچ انت –

پولیس ءِ رِد ءَ ھمے کار ءَ ھوار بوتگیں کتکار داد بکش پنام ءِ شعیب ءَ ھم کتکار زیب ءَ گور ءَ ٹریننگ کتگ – داد بخش سال دوھزار بیست ءَ اوگانستان ءَ ٹریننگ دیگ بوتگ –

زانگ بہ بیت کراچی ءَ بیست ءُ شش اپریل ءِ نیمروچ ءَ پدائی اُرش ءَ سَے چینی جھمننداں ھوار چار مردم مرتگ انت ءُ بازینے زدگ بوتگ انت –

کراچی اُرش ءِ زمہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ – گل جارکش جئیند بلوچ ءِ رِد ءَ اے کار بی ایل اے مجید برگیڈ ءِ اولی بلوچ زالبول پدائی شاری بلوچ پنام ءِ برمش ءَ کُتگ –

دومی نیمگ ےَ دزگیر بوتگیں شعیب بلوچ ءِ کھول ءِ رِد ءَ ھزدار نال ءَ سیادی داروکیں نودربر داد بخش پنام ءِ شعیب بلوچ ءُ ھمے سال ءِ بیست ءُ نھ اپریل ءَ کراچی ءِ دمگ گلستان جوہر بشیر ولیج ےَ آوار جنگ بوتگ بلے سی ٹی ڈی ءَ آئی دزگیری چار جولائی ءَ زاھر کتگ ءُ گوشتگ کہ ما شعیب کراچی ءِ دمگ ماری پور ءَ دزگیر کتگ –