بلوچانی آجوئی ءِ جد ءُ جھد وتی ھک ءِ سر ءَ اِنت – بی ایل ایف ءِ سروک

زیارت وئیل ءِ درگت ءَ شال ءَ بیتگیں زھرشانی ءِ سر ءَ پوج ءِ تیرگواری ءُ لَٹ ءُ کُٹانی پژدر ءَ بلوچ آجوئی لوٹوکیں رھشون ءُ بلوچستان لبریشن فرنٹ ءِ سروک ڈاکٹر اللہ نزر بلوچ ءَ چاگردی رسانکدرانی ویب سائٹ ٹوئٹر ءَ وتی یک ٹویٹے ءَ گُشتگ کہ بلوچ راج ءِ بیگواھیں مردمانی لاشانی چست کنگ ءَ پد دنیا ءَ اشی ءَ ستک بہ دار ایت کہ بلوچانی آجوئی ءِ جد ءُ جھد ءِ ھک ءَ اَنت-

آئی ءَ نبشتگ کرتگ کہ اسمبلی ءِ باسک نامی ئیں دانشور وتی چماں بند بہ کن اَنت آ ھم وتی چمانی دیم ءَ زمیر پروش بنت، ھمے وھد ءَ آئی ءَ گُشتگ کہ اے مات ءُ گوھاراں سلام پیش کن آں زُلم ءِ دیم ءَ کمر بند اَنت-

زانگ بہ بیت گوستگیں روچاں زیارت وئیل ءَ پاکستانی آرمی ءِ دروگیں دیم پہ دیمی جنگ ءَ پیسر بیگواہ بیتگیں مردمانی کوش ءِ ھلاپ ءَ کھولانی بیتگیں زھرشانی ءَ پولیس ءَ بیڑ برتگ ءَ روانک ءَ ھواریں مردم لَٹ ءُ کُٹ کتگ اَنت ءُ آنسو گیس فائر کتگ ءُ آ زدگ کتگ اَنت شیلنگ ءُ لَٹ ءُ کُٹ کنگ ءَ ابید ھم کھول شال ءَ ریڈ زون ءَ روگ ءَ سوبمند بیتگ اَنت ءُ زھرشانی اش بندات کتگ-

زانگ بہ بیت پاکستانی پوج ءِ جارکش ءَ زیارت آپریشن ءَ نُھ مردمانی جنگ ءِ ٹاہ داتگ اَت پوج ءِ رد ءَ کشگ بیتگیں مردمانی سیادی بی ایل اے ءَ اِنت بلے تنی وھدی بی ایل اے ءَ پوج ءِ اے گپ رد کتگ ءُ گوشتگ کہ کُشگ بیتگیں مردماں گوں بی ایل اے ءَ ھچ سیادی نیست اِنت –

بیگواھیں مردمانی یل کنائینگ ءِ واستا جھد کنوکیں گل وی بی ایم پی ءُ کھولانی گوشگ اِنت کشگ بیتگیں مردم پیسر ءَ بیگواھیں مردم اَنت ءُ اشانی نام بیگواھیں مردمانی ناماں ھوار اَنت-

زیارت وئیل ءَ کُشگ بیتگیں مردمانی تہ ءَ ھزدار ءِ جھمنندیں انجینیئر ظھیر بلوچ ھوار اِنت آئی ءِ گوھار ءِ رد ءَ آ دو ھزار ءُ بیست ءُ یک ءَ زورانسری آوار جنی ءِ آماچ جنگ ءَ پد ریاستی ادارھانی دزگیری ءَ بیتگ –

ظہیر بلوچ ءِ گوھار گوستگیں بازیں وھداں وتی برات ءِ یل کنائینگ ءَ زھرشانی ءَ بیتگ – عظمی بی بی ءَ گوشتگ ات برات ءِ یل کنائینگ ءَ ھر در ٹک اتگ اَنت بلے آ زندگی ءَ واتر نہ بیتگ بلے دَہ ماہ ءَ پد آئی ءَ مارا لاش دزکپتگ –

آئی ءَ گوشتگ کہ آئی ءِ برات ءَ ھچ گل ءَ گوں سیادی نہ بیتگ نانکہ آ زیارت ءِ پوج ءِ بیڑ ءَ دیم پہ دیمی ءَ جنگ بیتگ-

عظمیٰ ءَ گوشتگ ات کہ آئی ءِ برات اگاں دیم پہ دیمی ءَ جنگ بیتگ گڑا آئی ءِ دستاں زنجیر ءُ چکاں پٹی ءِ نشان پرچا ھست اَنت-

پاکستان ءِ نامی ئیں اھوالکاع ھامد میر ءَ چاگردی ترامجاہ ءَ نبشتہ کتگ ظہیر بلوچ گوستگیں سال ءَ چست کنگ بیتگ ءُ آئی ءِ برات ءَ زرغون آباد ءَ زورانسری آوار جنی ءِ نام ءَ ایف آئی آر نکش کتگ آئی ءِ گوھار ءَ وتی برات ءِ بیگواھی ءِ سر ءَ کُکار چست کتگ آئی ءِ راستی ھست اَنت بلے ریاست گوش ایت آ ناشرکارے بیتگ آئی لاش زیارت ءِ کوھاں دزکپتگ آئی ءِ سر ءَ کرنل لئیق ءِ کوش ءِ بھتام بیتگ-