ھاران ءُ ھزدار ءَ پوج ءِ دست ءَ دو مردم بیگواہ

بلوچستان ءِ دمگ ھاران ءُ ھزدار ءَ پاکستانی پوج ءِ دست ءَ دو کس آوار جنگ ءَ پد بیگواہ کنگ بیتگ اَنت-

بیگواہ کنگ بیتگیں مردمانی پجار مھمد اسلم ء ھاجی مھمد ابراھیم مینگل جھمنند ھاران ءُ اسد اللہ ء علی ھسن جھمنند ھزدار ءِ ناماں زانگ بیتگ اَنت –

دمگی مردمانی رد ءَ مھمد اسلم دو گاڑیاں ھواریں سلاہ بندیں سی ٹی ڈی ءِ کارمنداں گوستگیں شپ ءَ ھما وھد ءَ آوار جتگ ءُ برتگ کہ وتی سنگتانی ھمراھی ءَ لوگ ءَ روگ ءَ بیتگ-

دومی نیمگ ءَ ھزدار ءَ سر بیتگیں ھالانی رد ءَ گوستگیں شپ ءَ سلاہ بندیں مردماں یک لوگے ءِ سر ءَ بیڑ برتگ ءُ اسد اللہ زورانسری آوار جتگ ءُ برتگ-

زانگ بہ بیت بلوچستان ءَ اے وڑی ءَ مردمانی زورانسری آوار جنی ءِ پژدر ءَ بلوچ سیاسی پھناتاں ریاستی پورس ءُ آیانی پلامرزی ءَ ھستیں ٹولیانی سر ءَ بھتام جنگ ءَ اَنت بلے پوج اے بھتاماں یکشل ءَ رد کنگ اِنت-