دروگیں میڑ ءِ نام ءَ جنگ بیتگیں نُھ مردمانی تہ ءَ پنچ کسانی پجار بیتگ

بلوچستان ءِ بنجاھی شھر شال ءِ سول ھسپتال ءَ ایریں لاشانی پجار برجاہ اِنت، زانگ بہ بیت گوستگیں روچاں زیارت ءَ پاکستانی پوج ءَ نُھ مردم ءک دیم پہ دیمی جنگے ءِ ٹاہ داتگ ات ءُ آ بی ایل اے ءِ جنگول گوشتگ اَنت بلے بی ایل اے ءَ پوج ءِ اے گپ رد کتگ ات – داں انگت ءَ پنچ کسانی پجار پیسر ءَ پاکستانی پوج ءِ دست ءَ گرگ بیتگیں مردمانی ناماں زانگ بیتگ اَنت-

پیسر ءَ پجار بیتگینانی تہ ءَ شمس ساتکزئی کہ پنچ سال ءَ پیسر ءُ شھزاد دھوار ءِ نام ءَ بیتگ کہ ھمے سال ءِ جون ءِ ماہ ءَ بیگواہ کنگ بیتگ ات-

نوکتریں ھالانی رد ءَ دگہ سَے کسانی پجار بیتگ اَنت کہ اشانی تہ ءَ انجینئر ظہیر بنگلزئی جھمنند شال، مختیار بلوچ ء عبدالحئی جھمنند ھزدار ءُ سالم کریم جھمنند بالگتر کیچ ھوار اَنت-

کھول ءِ رد ءَ ظہیر بنگلزئی ءِ گڈی رُکستی ءِ چن ءُ لانچ بیگ ءَ اَنت – آ گوستگیں سال ءِ اکتوبر ءِ ماہ ءَ آئی ءِ کارگس “سمارٹ ویز کنسلٹنسی لمیٹڈ ائیرپورٹ روڈ شال ” ءِ نزیک ءَ آوار جنگ بیتگ-

مختار بلوچ شال ءِ دمگ موسیٰ کالونی ءَ ھمے سال ءِ چار جون ءَ دزگیر کنگ ءَ پد بیگواہ کنگ بیتگ-

زانگ بہ بیت اے وڑیں دروگیں دیم پہ دیمی جنگ بلوچستان ءَ پیسر ءَ ھم رپورٹ بیتگ اَنت کہ پیسر ءَ پوج ءَ دزگیر کتگ ءُ کُشتگ اَنت-

اے وڑیں گیشتر ھما وھد ءَ پیش اتکگ اَنت بلوچ آجوئی دوستیں گل مزنیں کاروائی کن اَنت گڑا ھمود ءَ بازیں کچے ءَ جانی تاوانانی دیمپانی کنگ یا مزنیں آفیسرے کاروائی ءِ میان ءَ جنگ بہ بیت-

اے انیگیں دروگیں میڑ یک ھنچیں وھدے ءَ دیم ءَ اتکگ کہ بلوچ آجوئی سلاہ بندیں گل بی ایل اے ءَ گوستگیں روچاں پاکستانی آرمی ءِ یک جاڑیگیں کرنلے زیارت ءَ دزگیر کتگ ءُ گوں وت برتگ ءُ پد ءَ کُشتگ ات-

پاکستانی پوج ءِ جارکش ءَ لشکر کشی ءِ وھد ءَ بی ایل اے ءَ بندوکیں مردمانی ٹاہ داتگ ات بلے بی ایل اے ءِ جارکش جیئند بلوچ ءَ رسانکدراں شنگ کتگیں درشان ءَ زیارت ءِ لشکر کشی ءَ وتی باسکانی جنگ ءِ گپ رد کتگ ات –

اے دروگیں میڑ ءِ نام ءَ جنگ بیتگیں مردمانی تہ ءَ داں انگت ءَ پنچ کسانی پجار بیتگ اَنت اے لاش شال ءَ سول ھسپتال ءَ ایر اَنت بلوچستان ءِ جتا جتائیں جاھاں بیگواھیں مردمانی کھول آیگ ءَ اَنت-