بلوچستان ءِ دارالھکومت شال ءَ یکشمبے ءِ روچ ءَ تیرگواری ءِ دو جتاجتائیں وئیلاں دو زالبولاں ھوار سے مردم بیران بوتگ اَنت-
سربوتگیں ھالانی رِد ءَ جان محمد دگ ءُ قمبرانی دگ سر ءَ تیرگواری ءَ چہ دو زالبولاں ھوار سے مردم بیران بوتگ اَنت-
تیرگواری ءِ بنداتی وئیل جان محمد دگ ءَ بوتگ کہ اود ءُ تیرگواری ءَ چہ یک مردمے بیران بوتگ ءُ آئی ءِ پجّار آزاد خان ء بگو خان نام ءَ چہ بوتگ-
وھدے کہ تیرگواری ءِ دومی وئیل قمبرانی دگ ءَ بوتگ کہ اود ءَ لوگ ءَ پترتگ ءُ تیرگواری ءَ چہ دو زالبول کُشگ بوتگ اَنت-
ایدھی ءَ لاش سول نادُراھجاہ ءَ برتگ اَنت گیشیں چار ءُ ٹپاس ءَ پد لاش کھول ءَ داتگ اَنت-
پولیس رِد ءَ وئیل لوگی جیڑھے ءُ کُتکار ءِ دزگیری ءِ ھاتر ءَ ٹولی دیم داتگ اَنت-