پوج ءِ دست ءَ زورانسری آوار جنگ بوتگیں مردم کُشگ بوگ ءَ انت – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیما بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ ھپسد ءُ دو روچ سرجم بوتگ انت – مروچی چہ بھاگ ناڑی ءَ سیاسی ءُ چاگردی باسک آفتاب بلوچ، اویس مستوئی، ارسلان بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچانی زورانسری آوار جنی ءُ چکچینی ءَ ریاست ءِ چیریں ادارہ، پوج ءُ سی ٹی ڈی ءِ دست تچکی ءَ مان انت ءُ اشانی گواہ مئے گور ءَ ھست انت – زورانسری آوار جنی بلاھیں جُرمے ءُ اقوام متحدہ ءِ چارٹر ءَ در انت ءُ انسانی ھکانی لگتمالی یے، دومی نیمگ ءَ پاکستان ءَ دنیا بلیک میل کتگ ءَ وتی زوراکی ءُ بلوچانی چکچینی ءِ درچ برجاہ داشتگ –

آئی ءَ گوشتگ بلوچستان ءِ تہ ءَ پاکستان ءِ چیریں ادارہ ھمک روچ زورانسری آوار جنگ بوتگیں مردماں وتی زندانانی تہ ءَ سک باز لٹ ءُ کُٹ کنگ ءَ انت آھاں شھید کنگ ءَ انت ءُ پدا آھانی زانگولیں جوناں ویرانگاں چگل دیگ انت – سال دوھزار یک ءَ بگر تاں روچ مروچی ھزارانی کچ ءَ بلوچ پرزند چیریں ادارہ، سی ٹی ڈی ءُ ایف سی ءَ سر بازار ، گاڑیانی تہ ءَ زانشجاھانی تہ ءَ آوار جتگ ءُ بیگواہ کتگ انت ءُ اے درچ ھمک روچ برجاہ انت کہ اشانی تہ ءَ کماش ءُ زالبولانی ھم مزنیں کچے ھوار انت –

ماما قدیر بلوچ ءَ گوشتگ کہ پاکستان ءِ واکدار چیریں ادارھانی کتکاریانی چیر دیگے ھاتر ءَ میاں استمان چماں ھاک مان کنگے جھد انت – اے جاورھالاں اقوام متحدہ کمیشن پاکستان ءِ بگیری ءَ بیدے دلپدردی درشاناں دگہ ھچ وڈیں گامگیج زورگ نہ انت-