نبشتانک: سمی دم درینگانے
نبشتہ کار: زبیر بلوچ
اولی بھر
دی بلوچستان پوسٹ
وھدیکہ زرکاری ءُ چاگردی نزام ءُ آئی ءِ ودگ چاگردی دیمروئی کت نہ کنگ ءَ آں گڑا چاگرد اوشت ءُ جمود ءِ آماچ بیت ھمے رنگ ءَ اگاں یک سیاسی سر ءُ پُرے یا جنز چاگردی جمود ءُ اوشت ءَ پروشگ ءَ نہ اِنت یا ابید جمود ءِ پروشگ ءُ سیاسی امل ءِ لیکہ پچ کنگ ءَ گیش فاشزم ءُ جنگو ازم ءِ نیمگ ءَ برگ ءَ اِنت گڑا تو سرپد بہ بیت کہ اے جنزے یا اے سیاسی سُر ءُ پُرئے ءِ مکسد بے منزل انت ۔ بے مکسدی ءُ بے منزلی ھر وھد ءَ گوں بے زانت ءُ بے پگر ءُ سسا ءَ ھمگرنچ بیت ۔بے مکسد ءُ بے منزلی چاگرد ءَ گیش ناگیگ ءُ جمود ءِ نیمگ ءَ بارت ۔ نا اُمیتی ءُ دلپروشی پیداک کنت۔
جنز ءُ سیاسی سر ءُ پر چاگرد ءِ جھلانکی زھنی دیم ءَ کنگ ءَ کمک ءُ مدت کنت چاگرد ءَ ساپ کن انت پلگار اَنت ءُ شیوار اَنت بلے ما گندگ ءَ ئیں مئے گور ءَ چیز اے رنگ ءَ نہ اَنت ابید جھلانکی زھن ءِ دیم ءَ کنگ ءَ چاگرد ءِ ساپ ءُ پلگارگ ءَ بھبیانکین گپ پیداک کنگ ءُ دلپروشی ودی بوان انت۔ راجی جنز پہ ھلو ھالو تیار نہ بنت جنز ءِ جوڑ بوگ ءَ دراجیں پند برگ بنت لس مھلوک ھر وھد ءَ دگانی سر ءَ آرگ نہ بنت مھلوک ءَ دگانی سر ءَ آرگ ءِ واستا راجدپتری ساھتانی ودار کنگ لوٹ ایت ۔ مئے گور ءَ ڈنک ءِ ناوشیں وئیل ءَ بگر داں ڈک چاغی ءَ درا درزنے ءَ گیش راجدپتری وئیل ءُ ساھت اتکگ ءُ شتگ اَنت بلے ورژن ءُ مکسد نہ بوگ ءِ سبب ءَ درست پہ بے مکسد بوتگ انت اے وئیلانی بوگ ءَ کس ءَ جنز ءِ شکل دات کت نہ کتگ یک زرمبشتے جوڑ کت نہ کتگ ایشی ءِ وجہ چے لیکہ ایش اِنت من نہ کشتگ ہلار نہ انت یا سروکی ءُ زانت ءِ کمی، اے چیزان چے پدر بوگ ءَ اِنت بلوچ ءِ گور ءَ سروکی ءِ کمی ءِ روچ پہ روچ چوں شومک ءِ ریش ءَ بوان انت اگاں شومک پہ وھد ءُ ٹیمب الاج مہ بیت جانی نُکس دنت ۔ بلوچ ءِ اے کمی چو ھمے مسال ءَ انت ۔اے سیاسی امل ءِ ھچ ھساب ءَ نہ انت کہ کسے بگش ایت کہ مھلوک سال ءِ دوازدہ ماہ ءَ گوں مہ بیت روڈ ءُ دگانی سر ءَ اے پریکٹس دنیا ءَ ہچ جاگہ نہ بوتگ۔ روڈ ءُ دَگ ءِ سر ءَ مھلوک راجدپتری ساھت ءُ وئیلانی ودار ءَ بہ کنت ۔ بلے آشوبی سروک نہ بوگ ءِ سبب ءُ بلوچ ءِ شنگ ءُ شانگی ءَ اے درستیں راجدپتری وئیل کہ برمش ءِ وئیل ءَ بگر داں چاغی ءِ وئیل ءَ اتکگ اَنت وت ماں وتی ناتپاکی ءَ چو دھی ءُ بلا پلیکتگ اَنت۔ داں روچ ئِے مروچی ھچ بلوچ پارٹی ءُ واننداں گلے ءَ اے چکاس نہ کتگ کہ اے راجدپتری ساھت ءُ وئیلانی بے مکسد کنگ ءِ زمہ وار کَے انت ءُ ایشانی اھتساب کجام ادالت ءَ چے کنگ بہ بیت ۔ھمے زمہ وار پدر کنگ بہ بنت۔
انچو کہ مارکس گش ایت بیدے یکمشت بوگ ءَ لس مھلوک پہ لٹ ءُ پل ءِ واستا را میٹریلے
سمی ءِ اے دومی سیمی دیوان انت ھمے گپ ءَ پیلس دیگ ءَ انت کہ مارا نوں دم برتگ ۔
سوال ایش کہ پرچہ دم برتگے
بلے ما اِد ءَ سمی ءَ میاریگ کت نہ کنیں پرچہ سمی میاریگ نہ انت سمی یک کودکیں چکے سینزدہ سال انت تھنا گوں وتی نزوریں کوپگاں برے اے دگ ءُ برے آ دگ برے اے شھر برے آ شھر برے اے چوک برے آ چوک ءُ فٹ پاتھ کپان ءُ پُرشان انت چوں دم نہ بارت الم دم بارت۔ھاں یکے گپے الم گشان آشوبی جھدکار دم نہ براں پرچہ کہ آھانی گور ءَ آشوبی پاٹی یے گوں آشوبی مکسد ءُ پروگرامے ءَ گوں وژن ءُ مکسدے ءَ ھروھد ساڑی ءُ ہمکوپگ انت۔
انچو کہ ٹراٹسکی گش ایت تو دم نہ برے تو کدی نہ جُک ئے تو بَھا ھوں نہ بئے اگاں تئی مکسد گوں آشوبی پروگرامے ءُ پگرے ءَ بندوک بہ بیت ۔
سمی یک بے میاریں کودکے میاری وَ ھما پروڈیوسر اَنت ڈائریکٹر اَنت کہ چوں اے رنگ ءَ سیاست ءَ پروڈیوس کنت ءُ ڈائریکشن کنگ ءَ ھر کارا دست مان کنگ ءَ انت۔ مسنگ پرسنانی جیڑہ تچک ءَ انسانی جیڑہ اد ءَ کسے کئیت دِگہ وتی سیاسی مکسد ءِ گِرگ لوٹ ایت گڑا بِزاں آ اَکل ءُ ھوش ءَ چے دور یک وابے ءُ اِلُوژن یے توک ءَ انت سرگ اش پگر ءُ زانت ءَ چے بے سما انت زمینی راستیاں نہ بلد انت ۔ الم ءِ گوات ئِے نہ لگیتگ۔ اگاں الم ءُ پلسپہ ءِ شمال ءَ کشیتگ بگندے کمو باز گوات ءِ لگیتگ ئے بلے چو وھابی مسلماناں بیدے آھاں کس مسلمان نہ انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔