بلوچستان ءِ دمگ کیچ ءِ ھند تمپ ءَ یک لوگے ءِ سر ءَ گولہ ءِ کپگ ءَ یکین کھول ءِ سَے مردم زدگ بیتگ اَنت-
دمگی مردمانی رد ءَ تمپ ءِ دمگ ءَ دو نیمگی تیرگواری ءَ پد پنجوئے ڈن ءَ موسیٰ نامیں مردمے ءِ لوگ ءِ سر ءَ گولہ کپگ ءَ موسیٰ ءَ ھوار آئی ءِ لوگبانک حفیظہ ءُ زھگ مائیکان زدگ بیتگ اَنت، حفیظہ ءِ جاور ناگیگ گوشگ بیتگ اَنت آ تربت ھسپتال ءَ برگ بیتگ-
ھال ءِ سر بیگ ءَ تمپ ءِ پولیس وئیلجاہ ءَ سر بیتگ ءُ چمدیستگیں مردنانی رد ءَ دوشی شپ ءِ ساھت یازدہ ءِ نزیک ءَ تیرگواری ءَ پد گولھانی توار اشکنگ بیتگ اَنت-
زانگ بہ بیت لھتے وھد ءَ پیسر ھمے دمگ ءَ گولہ ءِ کپگ ءَ زالبولے شھید بیتگ اَت کہ چریشی ءَ پد پاکستانی پوج ءِ ھلاپ ءَ دمگی مردماں زھرشانی کتگ اَت –