ھرنائی ءَ بی ایل اے اوتاکانی سر ءَ لشکر کشی، دو باسکانی جنگ ءِ ٹاہ جتگ

پاکستان پوج ءِ ھمگرنچیں آئی ایس پی آر ءَ ٹاہ جتگ کہ پوج ءَ گوستگیں 36 کلاکاں چہ ھرنائی ءُ منگی ڈیم ءِ دمگاں بی ایل اے ءِ اوتاکانی سر ءَ لشکر کشی برجاہ ءَ اِنت کہ آئی ءِ تہ ءَ ایس ایس جی کمانڈوز ءُ بالگرد بھر زورگ ءَ اَنت – پوج ءَ دْراھیں دمگ انگر ءَ کتگ ءُ تنی وھدے دو مردم جنگ بوتگ ءُ آیانی اوتاکاں چہ بمب ءُ سلاہ شور دست کپتگ اَنت-

آئی ایس پی آر ءِ رِد ءَ تُرندیں ھور ءَ اَبید نگیگیں دمگاں ءَ لشکر کشی تنی وھدے برجاہ ءَ اِنت – بلے سرکاری واکدارانی نیمگ ءَ گیشیں سرپدی نہ داتگ-

دگہ رسانکدرانی نیمگ ءَ چہ بی ایل اے ءِ باسکانی جنگ ءِ پدر نہ کتگ-

زیارت ءُ کش ءُ گور ءَ لشکر کشی ءِ ھال اِنت چریشی ءِ آسر ءَ چہ دمگی میتگاں تُرندیں تکانسری ءِ دیمپانی اِنت وھدے کہ یک دمگی مردمے ءِ دزگیری ءِ ھال ھم آھگ ءَ اِنت-

لشکر کشی ءِ بگیری ءَ دمگی مردماں زیارت ءِ نزیک ءَ یک بُنجاھی شھدگے بند کتگ – چریشی ءِ سبب ءَ گاڑیانی روگ ءُ آھگ مھتل اِنت ءُ مزنیں کچے ءَ مساپر ءُ مال بروکیں گاڑی پس اِتگ اَنت-

زانگ بہ بیت 12 جولائی ءَ پاکستانی پوج ءِ یک کرنلے زیارت ءِ دمگ ورچوم ءَ ناشناسیں مردماں وتی ھمراھی ءَ برتگ-

مروچی رسانکدر ءَ بلوچستان ءَ چست ایر کنوکیں سلاہ بندیں آجوئی لوٹوکیں گل بلوچ لبریشن آرمی ءِ نیمگ ءَ چہ رسانکدر ءَ شنگ کتگیں درشان ءِ تہ ءَ جیئند بلوچ ءَ گْوشتگ کہ پاکستان ءِ کرنل لئیق مرگ ءِ سزا داتگ-

جیئند بلوچ ءَ گْوشتگ کہ کرنل لئیق بی ایل اے اسپیشل فورس اسپیشل ٹیکٹیکل آپریشنز اسکواڈ ءِ انٹیلیجنس بیسڈ آپریشن ءِ وھد ءَ 12 جولائی دزگیر کتگ- وھدے کی مروچی کرنل ءِ لاش چہ زیارت ءَ دست کپتگ-