کراچی وتکش تراک، کتکار ءِ گِس ءَ گولہ ءُ مواد ءِ دستیگی ءِ ٹاہ

ھمے سال ءَ کراچی شھدربرجاہ ءَ چینیانی سر ءَ بوتگیں وتکش تراک ءَ ھواریں کتکار ءِ پجار کنگ بوتگ –

سی ٹی ڈی ءَ ٹاہ داتگ کہ کتکار داد بخش چم دیستیں گواہ ءَ آمیدگس ءَ پجار کنگے میان ءَ آ پجا آؤرتگ –

سی ٹی ڈی ءَ ٹاہ داتگ کہ آھاں گیشیں پٹ پول ءِ ھاتر ءَ نہارو گوٹ ءَ آئی گِس پٹ پول کُتگ کہ اود ءَ دگہ سبوت دست کپتگ انت کہ آھانی تہ ءَ دو دزبمب، ریموٹ کنٹرول سرکٹ، مواد، وائیر ڈیٹونیٹر بوتگ انت کہ آھاں دستیگ کتگ انت –

واکدارانی رِد ءَ کتکار ءِ سر ءَ گیشیں کیس نبشتہ کنگ بوتگ –

دومی نیمگ ءَ نودربر دادبخش پنام ءِ شعیب بلوچ ءِ گھار ءَ سی ٹی ڈی درسیں بھتام رد کُتگ انت ءُ گوشتگ کہ بیست ءُ نُھ اپریل ءَ وھدیکہ ریاستی کارمنداں شعیب اعظم ءِ کوٹی ءَ بیڑ برتگ شعیب ءِ کوٹی ءِ نزیک ءَ دگہ نودربر ھم وتی کوٹیاں بوتگ انت – ا وھد ءَ ایندگہ نودربر یل داتگ انت بس شعیب آوار جتگ ءُ گوں وت برتگ –

آئی ءِ گھار ءَ گوشتگ کہ منی پھم ءَ در ایں کہ آ وھدی پرچا شعیب ءِ گِس ءَ سلاہ دست نہ کپتگ –

آئی گوشتگ سند ءِ اطلاعات وزیر ءَ وتی پریس کانفرنس ءَ گوشتگ کہ آھاں شعیب ماری پور ہاکسبے ءَ دزگیر کتگ ءُ مرچی گلشن اقبال ءَ گِس ءِ سر ءَ بیڑ برگ ءُ سلاہ ءُ موادانی دستیگ کنگے ڈرامہ کنگ بوتگ یک دروگے ءَ چیردیگے ھاتر ءَ دگہ ھزاراں دروگ بندگایاں – آھاں اے زنگ لوٹیت کہ پہ دروگ راست چیردیگ نہ بیت –

زانگ بہ بیت بلوچ راجدوستیں پاٹی ءُ انسانی ھکانی گلاں سی ٹی ڈی ءِ اے کار ایرجتگ انت بازیں بیگواھیں مردماں زاھر کنگ ءُ آھانی سر ءَ دروگیں بھتام جنگ ءُ زندان دیم دیگے سی ٹی ڈی ءِ کار مشکوک گوشتگ انت –