جاؤ ءَ موبائیل ٹاور ءِ سر ءَ بوتگیں اُرش ءِ زمّہ واری بی ایل ایف ءَ منّ اِتگ –

بلوچ سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءَ جاؤ ءَ موبائیل فون ٹاورءِ سر ءَ بوتگیں اُرش ءُ آئی ءِ ماندارگے زمّہ واری منّ اِتگ –

جارکش گوھرام بلوچ ءَ گوشتگ کہ مئے سرمچاراں نُھ جولائی ءَ آواران ءِ دمگ جاؤ ءَ بگاڑی زیلک ءَ موبائیل ٹاور گوں تراکناکیں شورواں تباہ کتگ –

جارکش ءَ گوشتگ کہ یوفون کمپنی ءِ موبائیل ٹاور تراکناکیں شورواں گوں تباہ کنگ ءَ پد آئی ءِ ایندگہ مشین ءُ ازباب مانداشتگ انت – آئی ءَ گوشتگ کہ زورگیریں ریاست وتی آسراتی ءُ سرمچارانی ٹریس کنگے ھاتر ءَ موبائیل فون ٹاور ءَ کارمز کنگ ءَ انت – ما زورگیریں ریاست ءِ اے پندلاں شری ءَ سرپدیں اے دابیں درسیں سامراجی شوربندی سرمچارانی نشانگ ءَ انت –

جارکش میجر گوھرام بلوچ ءَ گڈسر ءَ وتی درشان ءِ تہ ءَ گوشتگ کہ بلوچستان ءِ آجوئی ءَ تاں زورگیریں پوج ءُ سامراجی شوربندیانی سر ءَ مئے اُرش ھمے داب ءَ برجاہ مان انت –