بلوچستان ءَ ھور ءُ ھاراں ھپتاد ءُ ھپت مردم بیران

پی ڈی ایم ءَ بلوچستان ءَ بشّی ھور ءُ ھاراں بوتگیں تاوانانی رپورٹ شنگ کتگ –

رپورٹ ءِ رِد ءَ سرجمیں بلوچستان ءَ بوتگیں ھور ءُ ھاراں بازیں مردمے بیران بوتگ انت کہ آھانی تہ ءَ چُک ءُ زالبول ھم ھوار انت –

ترندیں ھور ءُ ھارانی سوب ءَ بلوچستان ءِ دمگ پشین، قلعہ سیف اللہ، مسلم باغ، قلع عبداللہ ءُ ژوب ءَ ھشت ڈیم پُرشتگ انت وھدیکہ کان مہترزئی ڈیم ھم ترکیتگ –

ھالانی رِد ءَ جتا جتائیں ھند ءُ دمگاں اے ھور ءُ ھارانی سوب ءَ تنی وھدی ھپتاد ءُ ھپت مردم بیران بوتگ انت –

بازیں دمگاں ھارانی سوب ءَ مالدارانی سدانی کچ ءَ کُل ءُ کاپر، دلوت ھار ءَ بُرتگ انت ءُ چُک ءُ زالبولان ھوار پنچ مردم ھار ءَ بُرتگ ءُ بیران بوتگ انت وھدیکہ دو زالبول ءُ سَے زھگ گار انت، بلوچستان ءِ بازیں دمگاں ھور ءُ ھارانی آماچ بوتگیں دمگاں کمکی کار برجاہ انت –

پی ڈی ایم اے ءِ رپورٹ ءِ بیران بوتگیں مردمانی سیادی بولان، شال، ژوب، دکی، ھزدار، کوھلو، کیچ، مستونگ، ھرنائی، کلعہ سیف اللہ، ھب ءُ سبی انت –

رپورٹ ءِ رِد ءَ ھور ءِ میان ءَ پنجاہ ءَ گیش مردم وئیلانی آماچ بوتگ ءُ زدگ بوتگ انت، وھدیکہ سرجمیں بلوچستان ءَ سَے سد ءَ گیش گِس پُرشتگ ءُ کپتگ انت –

بلوچستان ءِ دمگ ہرنائی ءَ ھور ھارانی سوب ءَ ہرنائی تاں پنجاپ ءَ رؤکیں دگ بند بوتگ ءُ پدا ھور ءَ پد ھار ءِ آیگے سوب ءَ ہرنائی تاں پنجاپ ءَ رؤکیں شھدگ سرجمی ءَ بند بوتگ کہ ھچ وڈیں روگ آھگ نہ بوتگ- ھارانی سوب ءَ ھرنائی شال ءِ دو مزنیں پُھل پلوسین کور ءُ ناکس ءِ پھل ءَ سک باز تاوان بوتگ –

دومی نیمگ ءَ بلوچستان ءِ باپاری شھر حب چوکی ءِ دمگ بلوچ کالونی ءَ نوک جوڈ بؤکیں گِس ءِ چت ءِ کپگ ءَ چاردہ سالی عبدالرسول ء فیض محمد نامی زھگے چیر تریتگ ءُ بیران بوتگ-
ملکیار ءَ زھگ ءُ زالبولانی پھازگی گاڑی ھار ءَ بُرتگ چریشی ءَ گاڑی ءَ سواریں گاڑی ڈرائیور دو زالبول ءُ سَے زھگ آپ ءَ برتگ انت آھانی تہ ءَ سَے مردمانی جون درکنگ بوتگ انت وھدیکہ سَے ھنگت گار انت-

گوستگیں ھپتگ ءِ بیت کہ بلوچستان ءَ ھور ءُ ھاراں تباھی برجاہ انت وھدیکہ اشی ءَ پیش پی ڈی ایم اے ءَ بلوچستان ءِ بنجاھی شھر شال ءَ ترندیں ھورانی سوب ءَ ایمرجنسی جتگ – رپورٹ ءِ رِد ءَ گوستگیں روچ ءَ شال سریاب ءَ چت ءِ کپتگ ءُ دیوالانی پرشگے سوب ءَ سَے زالبولاں ھوار شش مردم بیران بوتگ انت، رودرآتکی بائی پاس ءِ دمگ ءَ ڈیم ءِ نزیک ءَ دو جنکو ھم آپ ءَ بُرتگ انت –

ڈیزاسٹر مینجمنٹ اتھارٹی ڈی جی ءِ رِد ءَ ترندیں ھورانی سوب ءَ بازیں دمگانی جاور ھال نگیگ انت وھدیکہ بازین دمگاں زمینی رؤگ آھگ ھم نہ بوگ ءَ انت –