نبشتانک: ائید مُبارک ھالو پُل
نبشتہ کار : مجاھد زاھد
دی بلوچستان پوسٹ
“بیھار مہ دئے من آں کہ من باجو نہ بوتگ آں “
“داں ھونے رگاں مان اِنت ترا چوں ھدا کن آں”
ھالد ءِ اگاں من ستا ءُ توسیپ ءَ بہ کن آں گُڑا من ءَ جند ءِ زمیر منی ملامت کنت پرچاکہ بلوچستان ءِ سرزمین ءِ سر ءَ لھتے ماتی انچیں مزن جگریں بچ ودی بوتگ اَنت کہ آھانی کِرد ءُ دلیری ءِ کسہ کنگ گوں منی وڑیں بے زانتیں ندکاراں نہ بیت ءُ ھالد ھم چَما ماتی سر نہ چنڈیں بچاں چے یکے بوتگ کہ پہ دشمن ءَ آسے بوتگ ءُ ھرگور ءَ چو دوزک ءِ آس ءَ پُُتروشتگ ئِے۔دشمن ءَ پہ ھالد ءِ گارکنگ ءِ واستا بازیں جد ءُ جھدے کُت،برے راھی بست،برے آئی ءِ نام ءَ مزنیں کچی ءِ زری ایر کُت کہ ھرکس بہ کُشتی یانکہ بْیارت ئِے من آھاں اے وڑ کناں،آ وڑ کناں،اینچوک زرّ دیاں بلے دشمن ءِ ساز اِتگیں پندل دُرست ناکام بوت اَنت ءُ ھالد انگت وتی جاہ ءَ برجاہ اَت ءُ چو سْیاجی ءِ کوہ ءَ دشمن ءِ دیم ءَ مِک اَت تھنا من ءَ ناں بلکیں مئے سرجمیں کھول ءُ مردمانی سرّ پہ پھرے چست اَت کہ ھالد ءِ پیمیں نرمزارے چہ مئے لوگ ءَ در اتکگ ءُ کوہ ءَ شُتگ پہ راج ءِ بے وسی ءِ ھاتر ءَ۔
چوناھا زانتکاریں مردم گُش انت کہ مردم وھدے کہ مھر ءِ پِڑ ءَ دور کنت گُڑا زندگی ءِ اے دگہ سرجمیں چست ءُ ایراں چہ سرگوز بیت، ھمے پیم ءَ مھر پد ءَ گوں وتی مات ءَ بزانکہ زمین ءَ بہ بیت گُڑا وَ ھچ گپ پشت نہ کپتگ۔ھالد ءَ ھم گوں وتی مات ءَ مھر بوتگ اَت،ھالد ءِ واھشت بس تھنا یکین اَنت کہ آ وتی مات ءَ چہ ھُوکّاں بہ رکین ایت۔
18 سال ءِ اُمر ءَ بہ گر داں 30 سال ءِ اُمر ءِ توک ءَ یک ورنایے ءِ دل ءَ زندگی ءَ پہ بازیں واھشتے ودی بیت، لھتے پہ کلدار،مال ءُ مڈی ءُ لھتے دگہ باریں چونیں چونیں واھشتاں گوں بندوک بیت،بلے کزا سد ورنا ءِ توک ءَ یکے ورنایے در بہ کپ ایت کہ آ چہ اے چیزاں سرگوز بہ بیت ءُ تھنا دل ءَ پہ زمین ءَ مھر بہ دار ایت،پہ راج ءَ بہ مار ایت،راج ءِ ننگ ءُ ناموس ءَ لگت مالی ءَ دیست مہ کنت،راج ءَ پہ گلامی ءَ دیست مہ کنت ءُ زمین ءِ سر ءَ درامدانی واجھی ءَ برداشت کُت مہ کنت۔
ھو منی مستریں لالا ھالد ءَ ھم وتی زند ءِ دُراھیں واھگ کل کُتگ اِت اَنت،آئی ءَ گوں سر ءِ چست کنگ ءُ وتی ھوش ءُ ھواس ءِ توک ءِ آئیگ ءَ گوں بس پہ راج ءَ جیڑ اِت،راج ءِ درد وتی درد کُت،آئی ءَ بس یک سرمچارے بوگ لوٹ اِت ءُ انچُش مارا دُرستاں یل کُت ءُ کوہ پہ کوہ بوت دانکہ پہ دائمی نمیران بوت۔ 20 اپریل 2021 ءَ منی لالا ءَ وتی مکھیں مات بگل ءَ کُت ءُ پہ ایمنی وپت بلے منی دل ءَ ھالد نہ مُرتگ،ھالد انگت منی توک ءَ زندگ اِنت،ھالد یک پگرے بیتگ،یک راھے بیتگ،ھمےواستا من گُشاں ھالد جان زندگ اِنت،مئے میان ءَ ھر وھد ءَ ساڑی اِنت،پمیشکا من مرچی گوں روچ ءِ ٹِک دیگ ءَ اولی ائید مبارک بات ءَ ھالد ءَ دیگ لوٹ آں۔
ھالو پُل،ائید مُبارک بات
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔