شال: ائید ءِ روچ ءَ بیگواھیں مردمانی کھول ءِ نیمگ ءَ زھرشانی

بلوچستان ءِ بنجاھی شھر شال ءَ ائید ءِ اولی روچ ءَ بیگواھیں مردمانی کھولاں روانکے کش اِتگ ءُ زھرشانی کتگ، زھرشانی ءَ بیگواھیں مردمانی کھول، سیاسی ءُ چاگردی باسکاں بھر زرتگ –

زھرشانی کنوکاں تران کنان ءَ گوشتگ کہ بلوچستان ءَ برجاھیں زلم زوراکیانی درگت ءَ انسانی ھکانی گل ھچ گوشگ ءَ نہ انت بلے باجواہ یات بہ داریت کہ اے درسیں زوراکیانی یک ناں یک روچ ءِ ھساب گرگ بیت اِنت، زوراکی ءِ روچ باز نہ بنت –

آھاں گوشتگ کہ پنجاپ ءِ تہ ءَ یک یوٹیوبر ءِ اھوالکار ءِ دزگیری ءَ آزمان سر ءَ زورگ بیت بلے بلوچستان ءَ ھزارانی کچ ءَ مردم سالاں سال بیگواہ کنگ بنت کس ءَ پرواہ نیست – انسانی ھکانی لگتمالی ءِ سر ءَ انسانی ھکانی ادارھانی ھچ نگوشگ ءَ پھم ءَ در انت –

بلوچستان شھدربرجاہ ءِ بیگواھیں نودربر سھیل بلوچ ءِ برات ءَ گوشتگ کہ آئی ءِ برات ءِ وانگ ءُ زانگے اُمر ایں بلے مروچی آ زندانان بندیگ ایں، آئی زند ءِ درگت ءَ.مارا تُرس ایں – ھدایا بچارے آئی ءَ یل بہ دئیت ءُ زند گوزینگے ھک دیگ بہ بیت –

بیگواھیں عبدالرشید بلوچ ءُ آصف بلوچ ءِ گھار سائرہ بلوچ ءَ تران کنان ءَ گوشتگ کہ اے ائید ءِ وشیانی روچ ءَ مردم وتی مردمانی گوم ءَ شاتکامی کنگ ءَ انت ما وتی ماتاں دیست نہ کنیں، وتی برات ءِ زھگانی بزگی ءَ گند ایں دل ترکیت، کسے ھست کہ اے مات ءُ زھگاں پسو دات بہ کنت؟ منی مات گُشت کہ آئی ءِ دل درد کنت، شما چوں اے درد ءِ ھساب ءَ دے؟ ھما زھگاں چی پسو دیے کہ وتی پت ءِ مھراں چہ زبھر انت ءُ بے بس انت – ماھگل وڈین زھگے ءَ اے ریاست ءِ چی ھراب کتگ کہ آئی ءِ پت آوار جنگ بوتگ، آ وھدی آ چار ماھی تپلے بوتگ، ھنو جست کنت کہ منی پت کئی ایں؟ کجا ایں؟ پرچا مئے گور ءَ نہ ایں؟

زھرشانی ءَ بی ایس او پجار ءِ سرکماش زبیر بلوچ ءَ تران کنان ءَ گوشتگ کہ اے ریاست وتی جوڈ کرتگیں کانوداں وت پالو کنگ ءَ نہ ایں گڈا ما اے ادارھانی گنڈہ گردی ءِ سر ءَ پرچا ھچ مگوش ایں – ما آ مردماں ھم گوشگ لوٹیں کہ آ شری ءَ بہ زان انت کہ ریاست آھاں ٹیشو پیپر ءِ وڈا کارمرز کنت ءُ دور دنت –

مئے مردم ریاستی ادارھاں آوار جتگ انت کہ آھانی درسیں سبوت مئے گور ءَ ھست انت ریاستی لشکر آھاں تیر جنت ءُ کشت کنت بلے ھو ما اشی ءِ بدل ءَ آھاں تیر جت نہ کنیں بلے پُرایمنیں جھد ءَ دزکش نہ بہ ایں –

زھرشانی ءَ ماما قدیر بلوچ ءَ گوشتگ کہ مارا درسیں بیگواھیں مردمانی ھاتر ءَ یک جاہ بوگ ءُ توار چست کنگ لوٹیت ما درسیں گلاں دزبندی کناں کہ بیا انت گوں ما ھوار بہ بنت جوانیں شور بندی ءَ گوں بیگواھیں مردم زوت یل کنگ بنت-

آئی ءَ گوشتگ کہ ادا بس جاوید اقبال ناں درسیں کمیشن ءِ مردم ءُ اے ادارھانی رویش بیگواھیں مردمانی کھول ءِ گوم ءَ ھمے وڈ بوتگ –

زھرشانی ءَ آغا زبیر شاہ ءُ دگہ مردماں ھم تران کتگ –