کراچی: زورانسری آوار جنیانی بگیری ءَ زھرشانی

سند ءِ مزن شھر کراچی ءَ بیگواھیں مردمانی کھول ءِ مزنیں ائید ءِ اولی روچ کراچی پریس کلب ءِ دیما گوستگ –
بیگواھیں مردمانی کھولاں کراچی پریس کلب ءِ دیما زھرشانی کنان ءَ وتی دوستیگیں مردمانی یل کنگے لوٹ کتگ، زھرشانی بلوچ یکجھتی کمیٹی ءِ چیردستی ءَ کنگ بوتگ کہ بیگواھیں مردمانی کھول، سول سوسائٹی ءُ نودربرگلانی رھشوناں بھر زرتگ-

زھرشانی میان ءَ زھگاں وتی پت آنی ھاتر ءَ گریتگ ءُ آھانی مات ارسیگ بوتگ انت – زھرشانی ءَ عبدالحمید زھری، شبیر بلوچ، محمد عمران، شوکت بلوچ، شعیب احمد ءُ نوربخش حبیب ءِ کھول ھوار بوتگ انت –

بلوچ یکجھتی کمیٹی ءِ آرگنائزر آمنہ بلوچ ءَ تران کنان ءَ گوشتگ پت ءُ براتانی زورانسری آوار جنی ءِ سوب ءَ آھانی کھول تنگدستی آماچ انت چریشی ءَ آھاں ائید ءِ کربانی ھم کرت نہ کتگ اھانی زھگاں نوکیں پوشاک گور ءَ نہ کتگ بلوچ گھار ءُ زھگانی ائید ءَ شاتکامی نہ کنگے سوب ریاستی پالیسی انت مالی نزوریانی سوب ءَ بلوچ ءَ ائید نہ کتگ وھدیکہ سرجمیں پاکستان ءَ مروچی ائید کنگ بوتگ، آھانی گس ءَ کربانی کُشگ بوگ ءَ انت جنک ءُ بچکیں زھگاں نوکیں گد گور ءَ شاتکامی کنگ ءَ انت بلے بدکسمتی ءَ ریاست ءَ چہ بلوچ ءَ ائید ءِ وشی پچ گپتگ انت –

آمنہ بلوچ ءَ گوشتگ کہ اے چونیں ریاست ءِ کہ زھگ ءُ زالبول ائید روچ ءَ دگانی سر ءَ زھرشانی کنگ ءَ لاچار بوتگ انت آئی ءَ گوشتگ کہ مئے تپلیں زھگ وتی پت آنی ھاتر ءَ گریوگ انت – آمنہ بلوچ ءَ زورانسری آوار جنی ایرجتگ ءُ گوشتگ کہ کراچی ءِ تہ ءَ زورانسری آوار جنی گیش بوان انت تنی وھدی بازیں ورنایے درکانودی آوار جنگ بوتگ انت ءُ آھانی زانگولیں جون دست کپتگ انت –

آمنہ بلوچ ءَ چہ سند ءِ سرکار ءَ لوٹ کتگ گوشتگ کہ اے کھولانی دوستیگیں مردم یل کنگ بہ بنت اگاں آھانی سر ءَ الزام ءِ ھست آمیدگس ءَ آرگ بہ بنت –

زھرشانی ءَ بلوچ یکجھتی کمیٹی ءِ ڈپٹی آرگنائزر لالا عبدالوھاب بلوچ، شیمہ کرمانی، نغمہ شیخ ءُ بیگواھیں مردمانی کھول ءُ سول سوسائٹی ءِ رھشوناں تران کتگ –