پاکستان زورانسری آوار جتگیں مردماں دیما بیاریت – گوادر زھرشانی

بلوچستان ءِ تیاب دپی دمگ گوادر ءَ مزنیں ائید ءِ اولی روچ ءَ زورانسری آوار جنی ءُ بیگواھیں مردمانی یل کنگے ھاتر ءَ مزنیں کچ ءَمردماں زھرشانی کتگ، زھرشانی کنوکاں چہ پاکستان لوٹ کتگ کہ زورانسری آوار جنگ بوتگیں مردماں دیما بیاریت –

زھرشانی کنوکانی تہ بازار ءِ چُک جنین ھوار ءَ بیگواھیں مردمانی کھول ھوار بوتگ انت کہ آھاں بیگواھیں مردمانی اکس پلے کارڈ گون بوتگ ءُ میرین ڈرائیو الجوہر وانگ جاہ ءَ بگر تاں سید ہاشمی چار راہ پیادگ روانک کش اِتگ ءُ پد ءَ رند ءَ مچی دروشم ءَ یکجاہ بوتگ انت –

زھرشانی مچی ءَ حق دو تحریک ءِ سروک ملا ہدایت الرحمان، حسین واڈیلہ ءُ دگہ مردماں تران کتگ ءُ گوشتگ کہ مروچی ائید ءِ روچ ءَ مھلوک شاتکامی کنگ ءَ انت بلے مئے مات ءُ گھار دگانی سر ءَ زھرشانی انت –

آئی ءَ گوشتگ کہ بازیں ماتے ءَ پانزدہ پانزدہ سالاں وتی زھگانی ودار کتگ ءُ تاں بیران بوتگ انت بلے ریاست ءِ دل ءَ کمے رھم ھم نہ اتکگ –

آئی ءَ گوشتگ کہ مئے واست ءَ ائید ءِ وشی ھچ مانا نہ دار انت بلوچستان گمزدگ کنگ بوتگ –

آئی ءَ گوشتگ کہ بلوچ مات ءُ گھات دگ ءُ پریس کلبانی دیم ءَ زھرشانی انت ءُ کدی لٹ کٹ سگگ انت -.

ترانکاراں گوشتگ کہ ریاست کتکار انت کہ مردماں سالاں سال بیگواہ کنت اگاں اے مردم کتکار انت گڈا آمیدگساں آرگ بہ بنت اے وڈ گار ءُ بیگواہ کنگ کتکاری یے ءُ اے کتکاری ریاست ءِ نیمگ ءَ بوگ ءَ انت –

ترانکاراں گوشتگ کہ اللہ ءُ آئی رسول ءِ واستہ اے مات ءُ گھارانی درد مارگ بہ بیت ءُ بیگواھیں مردم زاھر کنگ بہ بنت –