لچہ: ندر پہ انجیر کوہ ءِ شھید بوتگیں ھمبلانی نام
لچہ کار : شے مرید شاد
دی بلوچستان پوسٹ
مَل ءُ مل منی ملیں بچ
آشوب ءِ کُتگ رنگ نوں مَٹ
بالاد ءَ نہ وارتگ پروشے
تلاھیں کنگریں بچیگاں
ستک ءُ بس دل ءَ ایمانی
پھر بستگ سر ءَ بچانی
ھچ رنگ نہ بنت باجو اے
شیر بچ اَنت منی شیرانی
مات ءَ پہ وڑے نازینتگ
بچ ئِے پہ وتن رودینتگ
سالونکیں وتن بچاں پہ
بچیگ کمبر ءُ بالاچ اَنت
بچیگ آجوئی ءِ چیدگ
بچیگ سر وتن بکشاتگ
بچیگ دژمن ءَ را درس دنت
جنگی سنگر اِش مھکم کُت
جنگانی سپت تاھیر اِنت
سنگراں ھکل ئِے پِر داتگ
بالی گوں کنگریں بالاد ءَ
نشتگ گوں سنگر ءَ ھمنیاد ءَ
ساجُو وشبو اِنت کولواہ ءِ
ھمل توکلے جنز ءَ دنت
جنگ اِش گوں دژمن ءَ سک باز دات
کولواہ گوں شانے ءَ بچکند اِیت
بچاں مَلمڑیں نامے دات
راجدپتر ءَ مدام درپشان اِنت
وش کوشیں پروم ساچان اِنت
گوں ھوناں گُلزمین ءَ وش نود کنت
سالونکیں اَتا ءَ سر داتگ
تمردی ءُ میار جَلی پہ
پہ ھانی ئیں وتن دیوانگ
سگار جنت گرگاں شیری ئیں
باج ءَ را نہ بارت دژمن بھ
شیدائیں وتن بچانی
کسہ انگت ءَ آسر نہ اِنت
کسہ انگت ءَ آسر نہ اِنت