انسانی ھکانی بیگواھیں باسک راشد ھسین بلوچ ءِ گوھار فریدہ بلوچ ءَ مروچی مزنیں ائید ءِ روچ ءِ وتی یک درناشانے ءِ تہ ءَ گُشتگ کہ جھان ءِ پاکیں دین ءِ دودمان سنت ابراھیمی ءِ روچ ءِ وشیاں دارگ ءَ اَنت بلے مروچی مئے لوگ چہ چار سالاں وشیاں زبھر اِنت-
آئی ءَ گُشتگ گوستگیں روچ ءَ عرب ءِ شیکاں وتی کھولانی گون ءَ عید ءِ وشی داشتگ اَنت بلے آیاں منی مات ءُ مارا چار سالاں چہ یک تھاریں شپے ءِ دیمپان کتگ-
آئی ءَ گُشتگ کہ راشد ھسین بلوچ ءِ زورانسری آوار جنی ءَ چار سال ءَ گیش پِر گوستگ بلے مئے چم انگت ءَ انساپ ءِ درا اَنت- متحدہ عرب امارات ءَ ھوار پاکستان منی برات ءَ کانونی ءُ انسانی ھک دیگ ءَ نہ اَنت-
آئی ءَ دیمترا گُشتگ کہ گوستگیں چار سالاں ما کراچی ءُ شال ءِ پریس کلبانی دیم ءَ زھرشانیاں ھوار آمیدگساں روگ ءُ آیگ ءَ اِنت بلے ھچ وڑیں گامگیج زورگ نہ بیتگ بلکیں بیگواھیں مردمانی ھاترا ھستیں کمیشن منی مات ءَ ھوار بیگواھیں مردمانی کھولاں کمشرپ کن اَنت-
فریدہ بلوچ ءَ راشد ھسین ءِ بیگواھی ءِ بارو ءُ گیشیں گپ گُشان ءَ گوشتگ راشد ھسین بلوچ بیست ءُ شش دسمبر دوھزار ءُ ھژدہ ءَ متحدہ عرب امارات ءَ اود ءِ چیریں ادارھاں آیانی سیادانی دیم ءَ دزگیر ءُ بیگواہ کتگ -راشد ھسین انسانی ھکانی یک پرکاریں باسکے بیتگ آ متحدہ عرب امارات ءِ چیریں ادارھاں پاکستان ءِ سرکار ءِ گوشگ ءَ زورانسری بیگواہ کتگ ءُ شش ماہ ءَ داں ناشناسیں جاھے ءِ دارگ ءَ پد گیرکانونی رند ءَ پاکستان ءِ دست ءَ داتگ ءُ پد ءَ ھما اِنت بیگواہ اِنت –
فریدہ بلوچ ءِ گوشگ اِنت کہ میان اُستمان ءِ ادارہ برائے مھاھرین ءَ ھوار دگہ میان اُستمانی ادارھاں راشد ھسین ءِ کیس دیم دیگ بیتگ – ایمنسٹی انٹرنیشنل ءَ متحدہ امارات ءِ نام ءَ یک زوتکاری دزبندی ءِ شنگ کتگ بلے آئی ءَ ھچ پسو نہ رس اتگ-
آئی ءَ گُشتگ کہ میان اُستمانء ادارہ راشد ھسین ءِ کیس ءِ درگت ءَ بے تواری بازیں جست ایر کن اُنت بلکیں آیانی کارانی ڈاک جنگ ءَ اَنت-
فریدہ بلوچ ءَ گُشتگ کہ میان اُستمان بلوچستان ءَ سیاسی ءُ چاگردی تکاں سیادی داروکیں مردماں ھوار دگہ مردمانی بیگواھی ءِ سر ءَ گامگیج بہ زیر ایت ءُ وتی پرز ءَ پیلو بہ کنت-