دوستیگیں مردمانی بیگواھی ءَ ائید کُت نہ کن ایں، کراچی ءَ زھرشانی برجاہ

کراچی پریس کلب ءِ دیما بیگواھیں مردمانی ھاتر ءَ زھرشانی بنجل برجاہ، زھرشانی بنجل ءَ چاردہ روچ سرجم بوتگ انت –

زھرشانی بنجل ءَ بیگواھیں عبدالحمید زھری ءِ زھگ سعیدہ حمید ءَ گوشتگ کہ سرجمیں ملک ءَ ائید ءِ تیاری بوگ ءَ انت، مردم کربانی زورگ ءُ ائید شاپنگ ءَ کنگ ءَ انت بلے ما وتی دوستیگیں مردمانی بیگواھی ءِ سوب ءَ ائید ءِ تیاری ءَ ھم زبھر ایں پرچاکہ مئے کمائینوک بیگواہ انت چریشی ءِ سوب ءَ مئے مالی جاور نگیگ انت –

آئی ءَ گوشتگ کہ مئے دوستیگیں مردم ائید ءَ ساری یل کنگ بہ بنت تانکہ آ وتی ائید ءَ پہ وشی بگوازینان – سعیدہ حمید ءَ گوشتگ کہ اگاں آھانی دوستیگیں مردم یل کنگ نہ بوتاں گڑا ائید ءِ روچ ءَ ھم زھرشانی برجاہ بیت ایں –

مروچی زھرشانی بنجل ءَ عبدالحمید زھری، سعید عمر، شوکت بلوچ ءُ نوربخش حبیب ءِ کھول ساڑی بوتگ انت –